Kryeministri i Izraelit, Benjamin Netanyahu, raportohet se u ka thënë familjeve të pengjeve që po mbahen në Gaza se Izraeli e ka pranuar propozimin e ri amerikan për armëpushim.
Siç kanë raportuar mediat në Izrael, Netanyahu u ka thënë familjeve se propozimi është prezantuar nga emisari amerikan për Lindjen e Mesme, Steve Witkoff.
Më herët gjatë ditës, grupi militant Hamas ka thënë se e ka marrë një propozim të ri nga ndërmjetësit dhe po e analizon.
Propozimi përfshin lirimin e 10 pengjeve që po mbahen në Gaza dhe kthimin e 18 trupave të robërve të vdekur, në këmbim të një armëpushimi 60-ditor.
Propozimi përfshin edhe vazhdimin e ndihmave nga Organizata e Kombeve të Bashkuara për palestinezët.
Teksti nuk përfshin ndonjë premtim të Izraelit për fundin e luftës.
Shtëpia e Bardhë konfirmon se Izraeli ka pranuar propozimin për armëpushim
Photo: Associated Press
Izraeli e ka pranuar propozimin për armëpushim të përkohshëm me Hamasin, ka njoftuar zëdhënësja e Shtëpisë së Bardhë, Karoline Leavitt.
“Mund ta konfirmojë se i dërguari i posaçëm Steve Witkoff dhe presidenti i kanë dërguar një propozim për armëpushim Hamasit, të cilin Izraeli e ka pranuar dhe mbështetur”, ka thënë ajo para gazetarëve.
Por, Leavitt ka shtuar se bisedimet janë duke u zhvilluar dhe se Hamasi ende nuk i ka pranuar kushtet e propozimit. I dërguari i posaçëm për Lindjen e Mesme, Steve Witkoff, pati thënë të mërkurën se administrata e SHBA-së ishte afër prezantimit të një propozimi të ri.
Qëllimi i propozimit ishte lirimi i pengjeve të mbajtura në Rripin e Gazës si dhe kthimi i trupave të vdekur në këmbim të armëpushimit 60-ditor.
