-
Përktheu:
Flutura Gashi-Mehmeti
- 10 gusht 2025 15:48
- Shpërndaje në:
Kryeministri izraelit, Benjamin Netanyahu, ka deklaruar të dielën se banorët e Gazës po u luten izraelitëve dhe po ashtu botës që të çlirohen nga Hamasi.
Në një konferencë për media të dielën, pak para një takimi të OKB-së për Gazën, Netanyahu ka thënë se Hamasi është një "organizatë gjenocidale" dhe ka shtuar se asnjë komb nuk do të duronte të kishte një entitet "të përkushtuar ndaj shfarosjes së tij një gur larg kufirit të tij".
“Qëllimi i Izraelit nuk është të pushtojë Gazën, por ta çlirojë atë. Lufta mund të përfundojë nëse Hamasi liron pengjet dhe pranon të ulë armët”, ka deklaruar ai.
Mblidhet Këshilli i Sigurimit i OKB-së për Gazën
Këshilli i Sigurimit i OKB-së
Photo: Associated Press
Në Nju Jork, po zhvillohet takimi urgjent i Këshillit të Sigurimit të OKB-së (KSKB) lidhur me situatën në Lindjen e Mesme.
Miroslav Jenca, ndihmës sekretari i përgjithshëm për Evropën, Azinë Qendrore dhe Amerikën, ka thënë se njerëzit në shtetin e Palestinës janë në "rrezik më të madh".
Ai ka shtuar se plani i ri me pesë pika i Izraelit i miratuar të enjten është "një tjetër përshkallëzim i rrezikshëm i konfliktit".
"Ne tashmë po dëshmojmë një katastrofë humanitare në një shkallë të paimagjinueshme", ka thënë Jenca ndërsa ka përsëritur thirrjet për një "armëpushim të plotë dhe të menjëhershëm", si dhe lirimin e të gjithë pengjeve.
"Palestinezët kanë të drejtën e tyre që zëri i tyre të dëgjohet", ka thënë Jenca, duke shtuar se OKB-ja mbështet një zgjidhje me dy shtete. Ai gjithashtu ka bërë thirrje për zgjedhje të drejta.
Vendet evropiane reagojnë pas konferencës së Netanyahut
Photo: Associated Press
Mbretëria e Bashkuar, Danimarka, Franca, Greqia dhe Sllovenia sapo kanë lëshuar një deklaratë të përbashkët duke dënuar vendimin e Izraelit për të zgjeruar operacionet në Gaza.
Ato bëjnë thirrje që plani të anulohet përpara takimit të sotëm të Këshillit të Sigurimit të OKB-së, i cili pritet të fillojë së shpejti.
"Ky plan rrezikon të shkelë të drejtën ndërkombëtare humanitare", thonë vendet evropiane.
"Këshilli i Sigurimit ka bërë vazhdimisht thirrje për lirimin e pakushtëzuar dhe të menjëhershëm të pengjeve. Dhe ne jemi të qartë se Hamasi duhet të çarmatoset dhe të mos luajë asnjë rol në të ardhmen në qeverisjen e Gazës, ku Autoriteti Palestinez duhet të ketë një rol qendror. Por ky vendim nga Qeveria Izraelite nuk do të bëjë asgjë për të siguruar kthimin e pengjeve dhe rrezikon të rrezikojë më tej jetën e tyre”, thuhet më tej në deklaratë.
Deklarata gjithashtu i bën thirrje Izraelit të heqë kufizimet në shpërndarjen e ndihmave.
Izraeli ka pohuar se nuk ka kufizime në ndihmën në Gaza.
Izraeli s’ka zgjidhje tjetër veçse ta zgjerojë ofensivën në Gazë, thotë Netanyahu
Photo: Associated Press
Kryeministri izraelit, Benjamin Netanyahu, ka deklaruar të dielën se Izraeli nuk ka zgjidhje tjetër, veç se ta zgjerojë ofensivën dhe “ta mposhtë” Hamasin.
Ai ka thënë se 70-75% e Gazës është nën kontrollin ushtarak izraelit, por thotë se Hamasi ka dy fortesa të mbetura. Njëra është Qyteti i Gazës, "kampet qendrore" janë tjetra.
Të premten, kabineti izraelit i sigurisë udhëzoi IDF-në të "çmontojë" këto dy fortesa.
Netanyahu ka thënë se kjo është "mënyra më e mirë" për t'i dhënë fund luftës. Ai ka shtuar se Izraeli do t'u lejojë civilëve të shkojnë në zona të sigurta të caktuara ku do të kenë ushqim, siguri dhe kujdes mjekësor "të bollshëm".
Netanyahu po ashtu ka përshkruar “pesë parimet” për t’i dhënë fund luftës që sipas tij janë: çarmatimi i Hamasit, kthimi i të gjithë pengjeve, demilitarizimi i Rripit të Gazës, Izraeli merr "kontrollin mbizotërues të sigurisë" në Rrip dhe krijimi i një "administrate civile alternative" që nuk është Hamasi ose Autoriteti Palestinez.