Nëntë të vdekur dhe 50 të lënduar pas shembjes së një skene në Meksikë

Të paktën nëntë persona kanë vdekur, duke përfshirë një fëmijë, dhe 50 të tjerë janë lënduar pasi një skenë u shemb në një tubim të fushatës zgjedhore në shtetin verior të Nuevo Leon të Meksikës, ka bërë të ditur guvernatori lokal.

Incidenti ndodhi ndërsa kandidati presidencial i qendrës së majtë, Jorge Alvarez Maynez po mbante një fjalim në qytetin e San Pedro Garza Garcia, pranë Monterrey-t, raporton BBC.

Maynez nuk u lëndua në shembje dhe u pa duke folur me mbështetësit pas incidentit. Disa anëtarë të ekipit të tij ishin lënduar, sipas tij.

Shembja u shkaktua nga një erë e papritur e fuqishme, ka shkruar Maynez në një postim në X.

Pamjet e publikuara tregojnë momentin kur struktura e skenës u shemb ndërsa një numër njerëzish ishin në të.

Videoja e postuar në mediat sociale tregoi Maynez duke u përshëndetur mbështetësve të tij dhe më pas vraponte për siguri ndërsa një pjesë e strukturës u përmbys.

Guvernatori i shtetit, Samuel Garcia u kërkoi banorëve vendas të qëndrojnë brenda për shkak të stuhive dhe erërave të forta në zonë.

Maynez është kandidati i partisë Lëvizja Qytetare dhe aktualisht është në vendin e tretë në sondazhet kombëtare.