-
Përktheu:
Flutura Gashi-Mehmeti
- 28 shtator 2025 11:27
- Shpërndaje në:
Moldavët po votojnë të dielën në zgjedhjet parlamentare që mund ta bëjnë vendin fqinj me Ukrainën të devijojë nga rruga e tij pro-evropiane drejt Moskës.
Qeveria moldave dhe BE-ja akuzojnë Rusinë për "ndërhyrje të thellë".
Moldavia, një vend kandidat për në BE, ka qenë prej kohësh e ndarë për lidhje më të ngushta me Brukselin ose ruajtjen e marrëdhënieve të epokës sovjetike me Moskën.
Shumica e sondazheve tregojnë se partia pro-evropiane e Veprimit dhe Solidaritetit (PAS), e cila është në pushtet që nga viti 2021, kryeson në votim.
Qendrat e votimit janë hapur në orën 7 të mëngjesit dhe do të mbyllen në orën 9 të mbrëmjes, teksa rezultatet priten më vonë të dielën.
Presidentja pro-evropiane, Maia Sandu, e PAS e ka quajtur votimin "zgjedhjet më të rëndësishme" të Moldavisë dhe paralajmëroi kundër rënies më të thellë në orbitën e Moskës.
"Rezultati i tij do të vendosë nëse do ta konsolidojmë demokracinë tonë dhe do t'i bashkohemi BE-së, apo nëse Rusia do të na tërheqë përsëri në një zonë gri, duke na bërë një rrezik rajonal", ka shkruar Sandu në X të premten.
BE-ja ka thënë se Moldavia po përballet me “një fushatë të paprecedentë dezinformimi” nga Rusia.
Votuesit në vendin me 2.4 milionë banorë - një nga më të varfrit e Evropës, kanë shprehur zhgënjim për vështirësitë ekonomike, si dhe skepticizëm për përpjekjen për të fituar anëtarësimin në BE, të nisur pas pushtimit të Ukrainës nga Moska në vitin 2022.