Presidenti i Francës, Emmanuel Macron, dhe bashkëshortja e tij Brigitte kanë paraqitur padi për shpifje ndaj influencueses së krahut të djathtë, Candace Owens, e cila ka pretenduar se zonja e parë e Francës ka lindur si mashkull.
Padia është paraqitur të premten në Delaware të SHBA-së dhe në të thuhet se Owens ka shpërndarë “trillime shpifëse dhe të pabesueshme”, raportoi BBC.
Owens vazhdimisht ka përsëritur pretendimet në podcastin e saj dhe rrjetet sociale. Në mars të vitit 2024 ajo pati deklaruar se do ta vinte reputacionin e saj profesional në rrezik mbi atë se Briditte Macron “është në fakt një burrë”.
Teoria ka qarkulluar me vite se Brigitte Macron ka lindur mashkull dhe quhej Jean-Michel Trogneux. Owens e ka shpërndarë këtë teori me audiencën e saj prej gati 7 milionë ndjekësish.
Macron thuhet se i ka kërkuar disa herë Owensit që ta tërhiqte deklaratën.
