Luftëtarët anti-Putin marrin rob dy ushtarë rusë

Luftëtarët kundërshtarë të qeverisë në Moskë thonë se kanë kapur dy ushtarë rusë në Belgorod, pranë kufirit me Ukrainën.

Zyrtari më i lartë i Belgorodit tha se ai kishte rënë dakord të takohej me personat që kapen ushtarët nëse këta të fundit ishin ende gjallë.

Rusia ka fajësuar Ukrainën për sulmet e fundit në territoret e saj kufitare, por Kievi mohon të jetë i përfshirë drejtpërdrejt.

Ushtria ruse tha të dielën se artileria e saj kishte goditur një grup "terrorist" pranë fshatit Novaya Tavolzhanka.

Më herët, një grup paraushtarakësh lëshuan një mesazh në aplikacionin Telegram, duke thënë se i kishin kapur dy burrat, por do t'i dorëzonin nëse guvernatori i Belgorodit, Vyacheslav Gladkov, do të pranonte bisedimet.

Videoja supozohej se tregonte të dy robërit.

Mesazhi u postua nga Korpusi Vullnetar Rus (RDK) dhe u përshkrua si një deklaratë e përbashkët me Legjionin e Lirisë së Rusisë (FRL).

Të dy grupet duan të rrëzojnë presidentin Vladimir Putin dhe gjithashtu kundërshtojnë pushtimin në shkallë të plotë të Ukrainës i cili filloi në shkurt të vitit të kaluar.

Zyrtarët ukrainas thonë se dy organizatat paraushtarake përbëhen nga qytetarë rusë që duan të krijojnë një “zonë sigurie” për ukrainasit.

RDK u bë e njohur në mars për një bastisje ndërkufitare në rajonin Bryansk të Rusisë. Udhëheqësi i saj është një nacionalist rus me lidhje të dyshuara me neo-nazistët.

FRL konsiderohet një lloj tjetër organizate që lufton përkrah trupave ukrainase kundër forcave ruse.