Kush është Dan Driscoll, “djali i dronëve” i Trumpit që mori rol kyç në bisedimet për Ukrainën?

Kur bisedimet për t'i dhënë fund luftës Rusi-Ukrainë morën një kthesë të papritur javën e kaluar, me rrjedhjen e një plani paqeje që thuhet se erdhi nga SHBA-ja, administrata Trump dërgoi një figurë të papritur për të marrë pjesë në një mori takimesh jashtë shtetit.

Sekretari më i ri i ushtrisë, 39-vjeçari Dan Driscoll, shpesh quhet "djali i dronëve" i presidentit Donald Trump për përqafimin e tij të teknologjive të reja të betejës. Deri vonë, ai ishte i njohur kryesisht për diskutimet mbi buxhetet, furnizimet dhe çështjet e stafit në degën më të madhe të ushtrisë.

Driscoll nuk duket se ka një histori të gjatë të trajtimit të Rusisë dhe Ukrainës, apo përvojë në diplomacinë ndërkombëtare, dhe nuk ka mbajtur kurrë poste publike.

Pra, kush është kjo figurë gjithnjë e më e shquar brenda administratës?

Aleat i ngushtë i zëvendëspresidentit JD Vance

Është marrëdhënia e Driscollit me tani zëvendëspresidentin, JD Vance, që e solli atë në orbitën e Trumpit.

Ashtu si miku i tij Vance, Driscoll ndoqi një universitet publik përpara se të bashkohej me ushtrinë amerikane dhe më pas mori diplomën e tij në drejtësi në Universitetin prestigjioz Yale. Të dy burrat punuan edhe në financë pas diplomimit.

Gjatë karrierës së tij ushtarake, Driscoll u bë oficer në vitin 2007, udhëhoqi një togë kalorësie dhe u dërgua në Irak për disa muaj në vitin 2009.

Ai ka treguar historinë e takimit me Vance përmes një grupi studentësh veteranësh në shkollën e drejtësisë, gjatë së cilës Vance i siguroi studentët e rinj se në fillim do të ndiheshin sikur nuk i përkisnin vendit, por do të shkëlqenin në mësime pas disa muajsh. Shpejt, Vance u bë miku dhe mentori i Driscoll.

Driscoll ishte me pushime me familjen e tij në Zvicër në verën e vitit 2024 kur Vance e telefonoi për t'i thënë se do të ishte kandidati për zëvendëspresident i Trumpit dhe i kërkoi t'i bashkohej fushatës.

Të nesërmen, Driscoll fluturoi përsëri në SHBA, bleu një kostum në një qendër tregtare dhe mori një Uber për në Konventën Kombëtare Republikane, i tha ai revistës së ish-studentëve të Universitetit të Karolinës së Veriut, Chapel Hill - institucioni ku ai ishte student universitar.

Sapo Trumpi u kthye në detyrë, Driscoll u miratua si sekretar i ushtrisë në votimin e konfirmimit të tij në Senat. Sfera e tij e ndikimit u zgjerua pasi ai u bë një figurë kyçe në vendosjen e Gardës Kombëtare nga Trumpi në qytetet e SHBA-së. Më pas, ai mori edhe rolin e drejtorit në detyrë të Byrosë së Alkoolit, Duhanit, Armëve të Zjarrit dhe Eksplozivëve.

Vizita e paparalajmëruar në Ukrainë

Driscoll ka folur shpesh për luftën në Ukrainë - duke i cilësuar dronët ukrainas si një teknologji relativisht të lirë, të prodhuar në masë, që është e mirë për luftime.

Por, pasi u nominua për postin e sekretarit të Ushtrisë, fillimisht nuk dukej se ai ishte i përfshirë në negociatat për t'i dhënë fund luftës. Trumpi po mbështetej në të dërguarin e tij të posaçëm, Steve Witkoff, për të punuar mbi një plan për armëpushim.

Kur detajet e një plani 28-pikësh të hartuar nga SHBA-ja dhe Rusia u zbuluan javën e kaluar, Ukraina shprehu shqetësim për disa nga pikat e saj kryesore, dhe aleatët e saj evropianë ndoqën shembullin.

Driscoll më pas bëri një vizitë të panjoftuar në Ukrainë së bashku me figura të tjera të larta të Pentagonit, grupi më i lartë ushtarak që udhëton në Kiev që kur Trumpi mori detyrën në janar. Qëllimi, sipas një zëdhënësi të ushtrisë amerikane, ishte që ai të takohej me zyrtarë ukrainas dhe të diskutonte përpjekjet për t'i dhënë fund luftës.

Driscoll u takua me Zelenskyn dhe më pas, sipas Politico, u prit në rezidencën e ambasadorit amerikan.

Në ditët në vijim, Driscoll mori pjesë në më shumë diskutime me zyrtarë ukrainas në Gjenevë së bashku me sekretarin e Shtetit, Marco Rubio, Witkoff dhe dhëndrin e Trumpit, Jared Kushner, dhe ndihmoi në hartimin e një "kornize paqeje të përditësuar dhe të rafinuar". Ai vazhdoi të zhvillojë bisedime me zyrtarë rusë në Abu Dhabi, sipas CBS Neës.

Një i dërguar i ardhshëm... apo sekretar Mbrojtjeje?

Duke emëruar Driscoll si sekretar të Ushtrisë, Trumpi shkroi se ai kishte një "kombinim të fuqishëm përvojash për të shërbyer si një agjent ndryshimi.

Disa në Uashington po pyesin veten nëse këto cilësi dhe paraqitja e tij e fundit në skenën botërore nënkuptojnë që Driscoll një ditë mund të zëvendësojë Pete Hegseth, nëse Hegseth ndonjëherë tërhiqet nga posti i tij si sekretar Mbrojtjeje.

Ekziston gjithashtu mundësia që Driscoll të marrë zyrtarisht rolin e negociatorit me Ukrainën kur i dërguari special i Trump në vend, Keith Kellogg, të largohet në janar.

Driscoll më parë ka theksuar se babai dhe gjyshi i tij kanë shërbyer në ushtri para tij, dhe ai shpesh flet për vizionin e tij për transformimin e ushtrisë.

Ditë para se të nisej për në Ukrainë, Driscoll përshkroi në podkastin "The Conversation "se si e imagjinonte të ardhmen e afërt, kur "çdo këmbësor... do të mbajë një dron në betejë" dhe ushtarët do të mbështeten në inteligjencën artificiale sepse truri njerëzor nuk do të jetë në gjendje të "mbajë ritmin".