Konfrontimi ushtarak duket i pashmangshëm nëse s’ka marrëveshje me Iranin, thotë Franca

Ministri i Jashtëm i Francës ka paralajmëruar të mërkurën se nëse fuqitë botërore nuk do të munden që shpejt të arrijnë një marrëveshje të re me Iranin mbi programin e tij bërthamor, atëherë një konfrontim ushtarak duket “pothuaj i pashmangshëm”.

Duke folur pas takimit të rrallë të kabinetit qeveritar me presidentin Emmanuel Macron, Jean-Noel Barrot dukej se rriti presionin ndaj Teheranit me deklaratat e tij.

Macroni ka mbledhur të mërkurën ministrat kyç dhe ekspertët për të diskutuar për Iranin, mes tensioneve në rritje mes Teheranit dhe presidentit amerikan, Donald Trump, raportoi Reuters.

Një mbledhje e tillë kabineti dedikuar një teme specifike është e rrallë në Francë dhe tregon për shqetësimet në ngritje mes aleatëve evropianë të Washingtonit se SHBA-ja dhe Izraeli mund të nisin sulme ajrore në objektet bërthamore të Iranit nëse nuk arrihet një marrëveshje së shpejti.

Sekretari amerikan i Mbrojtjes, Pete Hegseth, ka forcuar kapacitetet ushtarake të SHBA-së në Lindjen e Mesme me më shumë avionë luftarakë, ka thënë Pentagoni të martën. Ndërkohë, SHBA-ja ka nisur një fushatë bombardimi kundër grupit Houthi që kontrollon shumicën e Jemenit dhe mbështetet nga Irani.

Një zyrtar i lartë evropian ka thënë se strategët kanë ngrehur shqetësimin nëse kjo fushatë është shenjë paralajmëruese e SHBA-së për një goditje mbi Iranin në muajt në vijim.

Trumpi, i cili e ka nxitur liderin suprem iranian të angazhohet menjëherë në negociata, ka kërcënuar Iranin të dielën me bombardim dhe tarifa të tjera nëse nuk dakordohet për një marrëveshje për programin bërthamor.