-
Përktheu:
Flutura Gashi-Mehmeti
- 14 janar 2026 13:10
- Shpërndaje në:
Kina ka regjistruar suficitin më të madh tregtar në botë në vitin 2025.
Vendi aziatik ka mbyllur një vit në të cilin, si prodhuesi më i madh në botë, sfidoi presionin tregtar të SHBA-së duke rritur eksportet në tregje të tjera globale.
Suficiti i madh tregtar - një masë që tregon se sa më shumë një vend eksporton sesa importon, ka arritur në një rekord prej 1.2 trilionë dollarësh, duke shënuar një rritje prej 20% nga viti 2024.
Kompanitë kineze kanë thelluar kthesën e tyre larg konsumatorëve amerikanë drejt tregjeve në zhvillim në Azinë Juglindore, Afrikë dhe Amerikën Latine.
Eksportet e Kinës në SHBA, historikisht tregu më i madh i Kinës, kanë rënë me 19.5% në përgjithësi në vitin 2025 krahasuar me vitin e kaluar.
Por, ndërsa rezistenca e Pekinit përballë luftës tregtare të presidentit të SHBA-së, Donald Trump, do të shpallet si një fitore brenda Kinës, globalisht, suficiti rrezikon të nxisë më tej tensionet tregtare midis kombeve që kanë frikë se do të mbingarkohen nga importet kineze me kosto më të ulët.
Zyrtarët kinezë e kanë cilësuar tregtinë e fortë, veçanërisht në sektorë kyç si automjetet elektrike, si një shenjë të qëndrueshmërisë së vendit, edhe pse eksportet drejt SHBA-së kanë rënë ndjeshëm, ndërsa dy ekonomitë më të mëdha në botë u përfshinë në një përballje tregtare “dhëmb për dhëmb” gjatë gjithë vitit të kaluar.
Analistët kanë vënë në pikëpyetje nëse Kina mund ta ruajë nivelin e eksporteve në pjesën tjetër të botës gjatë vitit të ardhshëm - veçanërisht ndërsa vendet po eksplorojnë gjithnjë e më shumë mënyra për të mbrojtur tregjet e brendshme nga ajo që zakonisht quhet "kapacitet i tepërt industrial" kinez.
Mbështetja e Kinës te eksportet si një motor rritjeje është e lidhur edhe me sfidat në vend, ku ekonomia është zvarritur nga një krizë e vazhdueshme e sektorit të pronave.
Autoritetet kanë luftuar për të rritur konsumin e brendshëm dhe për të arritur një model të dëshiruar, në të cilin sektori i gjerë i prodhimit të vendit fuqizohet nga një kërkesë e fortë si në vend ashtu edhe jashtë vendit.