Kina kritikon ndalesën e SHBA-së për regjistrim të studentëve të huaj në Harvard

Qeveria kineze ka njoftuar të premten se vendimi i administratës Trump për të ndaluar studentët e huaj që të regjistrohen në universitetin e Harvardit, dëmton seriozisht prestigjin ndërkombëtar të Shteteve të Bashkuara të Amerikës, transmeton AP.

Dy prej komuniteteve më të mëdha të studentëve në Universitetin e Harvardit, janë studentët kinezë dhe ata indianë. Harvardi pati pranuar 6,703 studentë të huaj në të gjitha programet e tij gjatë vitit 2024, teksa 1,203 prej tyre ishin nga Kina dhe 788 nga India.

Vendimi i administratës Trump, që u bë publik të enjten, ishte temë shumë e diskutuar në rrjetet sociale kineze. 

Transmetuesi publik në Kinë (CCTV) ka ngritur pikëpyetje nëse SHBA-ja do të vazhdojë të jetë destinacioni kryesor i studentëve ndërkombëtarë, duke nënvizuar se Harvardi ka për ta paditur tashmë ekzekutivin në gjykatë.

“Bashkëpunimi arsimor me Shtetet e Bashkuara sjell përfitime të ndërsjella, dhe Kina e kundërshton politizimin e këtij procesi”, ka thënë zëdhënësja e Ministrisë së Jashtme të Kinës, Mao Ning.

“Veprimet e ndërmarra nga Shtetet e Bashkuara do të dëmtojnë vetëm imazhin e tyre dhe kredibilitetin ndërkombëtar”, ka shtuar ajo.

Si kundërpërgjigje, universitetet në Hong Kong kanë ofruar mundësi për studentët e prekur, ndërsa disa institucione të tjera, si Universiteti i Shkencës dhe Teknologjisë në Hong Kong, kanë shprehur gatishmërinë për të ndihmuar ata që janë të prekur nga ky vendim.

Ky zhvillim është pjesë e një tendence më të gjerë të tensioneve midis SHBA-së dhe Kinës në lidhje me politikat e vizave për studentët dhe shqetësimet për sigurinë në Amerikë, duke çuar në një zhvendosje të preferencave të studentëve kinezë drejt destinacioneve të tjera si Mbretëria e Bashkuar, Australia dhe Singapori.