Kina kritikon Macronin për paralelen e ngritur mes Ukrainës dhe Tajvanit

Autoritetet kineze i kanë kritikuar përpjekjet e presidentit francez, Emmanuel Macron, për të lidhur mbrojtjen e Ukrainës me nevojën për të mbrojtur Tajvanin nga një pushtim i mundshëm kinez, raporton Reuters.

Si pjesë e një fjalimi më të gjerë mbi rreziqet e përçarjes midis Kinës dhe Shteteve të Bashkuara, Macroni ishte shprehur të premten para forumit të sigurisë “Shangri-La Dialogue” në Singapor, se nëse Rusisë i lejohet të aneksojë territore në Ukrainë pa asnjë pengesë, atëherë “çfarë mund të ndodhte në Tajvan?”. 

Përmes një postimi në rrjetin social Facebook, ambasada e Kinës në Singapor ka bërë të ditur se krahasimi i çështjes së Tajvanit me çështjen e Ukrainës është “i papranueshëm”.

“Të dyja dallojnë për nga natyra dhe nuk janë aspak të krahasueshme”, thuhet në postim, teksa nënvizohet se Tajvani është krejtësisht çështje e brendshme e Kinës.

“Nëse dikush përpiqet të denoncojë një ‘standard të dyfishtë’ me një standard të dyfishtë, rezultati i vetëm që mund të marrim është përsëri një standard i dyfishtë”, thuhet më tutje.

Postimi i ambasadës kineze nuk iu referua drejtpërsëdrejti Macronit por u shoqërua me një foto të tij duke folur në ngjarjen e lartcekur.

Kina e sheh Tajvanin si territorin e saj dhe ka premtuar të “ribashkohet” me ishullin demokratik dhe autonom, madje nëpërmjet përdorimit të forcës nëse është e nevojshme. Ajo ka rritur presionin ushtarak dhe politik për të vërtetuar këto pretendime, përfshirë intensifikimin e stërvitjeve ushtarake rreth Tajvanit.