-
Përktheu:
Flutura Gashi-Mehmeti
- 3 nëntor 2025 12:16
- Shpërndaje në:
Carlos Mazon, presidenti i sulmuar i rajonit lindor spanjoll të Valencias, është dorëzuar para zemërimit publik dhe presionit politik duke dhënë dorëheqjen për shkak të menaxhimit të dobët të përmbytjeve vdekjeprurëse që vranë 229 persona në zonë, pak më shumë se një vit më parë.
Mazon, një anëtar i Partisë Popullore Konservatore (PP), ia kishte dalë mbanë pavarësisht thirrjeve që ai të jepte dorëheqjen.
Refuzimi i tij kokëfortë për të dhënë dorëheqjen kishte shkaktuar një sërë demonstratash masive në të gjithë Valencian, shumë prej të cilave nën sloganin: "Baltë në duart tona, gjak në duart e tij".
Një sondazh i kohëve të fundit zbuloi se 75% e valencianëve besonin se Mazon duhet të jepte dorëheqjen.
Por të hënën, Mazon iu dorëzua të pashmangshmes dhe njoftoi se do të braktiste presidencën rajonale.
“Nuk mund të vazhdoj më”, u ka thënë ai gazetarëve pas një fjalimi në të cilin ka kritikuar ashpër reagimin e qeverisë kombëtare ndaj krizës. Ai nuk ka treguar nëse po thërriste zgjedhje të parakohshme, as nuk sqaroi nëse po hiqte dorë edhe nga vendi i tij në asamblenë rajonale - gjë që do t’i jepte fund imunitetit të tij parlamentar.
Mazon më parë kishte këmbëngulur se nuk kishte “asnjë qeveri në botë që ka mjetet për të ndryshuar, ndaluar ose shmangur një episod shirash të rrëmbyeshëm”.