Ish-presidenti gjeorgjian, Mikheil Saakashvili dënohet me 9 vjet burgim

Ish-presidenti gjeorgjian, Mikheil Saakashvili, është dënuar të mërkurën me nëntë vjet burgim pasi u shpall fajtor për përvetësim, ka njoftuar agjencia e lajmeve Interpress.

Saakashvili, i cili ishte president nga viti 2004 deri në vitin 2013, është dënuar me gjashtë vjet burgim për shpërdorim të pushtetit pasi u kthye në Gjeorgji në vitin 2021 pas një kohe jashtë vendit. Ai e ka kaluar pjesën më të madhe të atij dënimi në një spital burgu, raporton Reuters.

Televizioni gjeorgjian ka shfaqur skena trazirash në sallën e gjyqit pas shpalljes së vendimit, me mbështetësit e Saakashvilit që e quanin gjyqtarin "skllav" të qeverisë aktuale.

Një figurë thellësisht polarizuese në Gjeorgji sot, Saakashvili është ngritur në pushtet në Revolucionin e Trëndafilave të vitit 2003.

Në pushtet, ai e ka riorientuar Gjeorgjinë drejt Perëndimit dhe ka filluar një program ambicioz reformash të sektorit publik që ka sjellë përmirësime të shpejta në vendin e Kaukazit Jugor prej 3.7 milionë banorësh.

Megjithatë, pjesa e fundit e mandatit të tij është shënuar nga autoritarizmi, brutaliteti policor dhe një luftë katastrofike e vitit 2008 me Rusinë.

Në vitin 2012, partia e tij “Lëvizja e Bashkuar Kombëtare” ka humbur zgjedhjet ndaj një koalicioni të kryesuar nga Bidzina Ivanishvili, një biznesmen miliarder që mbetet lider de facto i Gjeorgjisë edhe sot e kësaj dite.

Pas largimit nga detyra, Saakashvili është transferuar në Ukrainë, ku ka shërbyer për një kohë të shkurtër si guvernator i rajonit jugor të Odesës.

Në vitin 2021, ai është kthyer në Gjeorgji, pavarësisht se ishte dënuar në mungesë për shpërdorim detyre. Ai është arrestuar dhe u burgosur në momentin e mbërritjes.