-
Përktheu:
Flutura Gashi-Mehmeti
- 24 dhjetor 2025 09:06
- Shpërndaje në:
Një ish-ndihmësi i ngushtë i kryeministrit, Benjamin Netanyahu, ka thënë se menjëherë pas sulmit të Hamasit në tetor 2023 që shkaktoi luftën dyvjeçare të Izraelit në Gazë, udhëheqësi izraelit e udhëzoi atë të kuptonte se si kryeministri mund t'i shmangej përgjegjësisë për shkeljen e sigurisë.
Ish-zëdhënësi i Netanyahut, Eli Feldstein, i cili përballet me gjyq për rrjedhje të dyshuar të informacionit të klasifikuar në shtyp, lëshoi akuzën gjatë një interviste të gjatë me kanalin e lajmeve Kan të Izraelit të hënën në mbrëmje.
Kritikët e kanë akuzuar vazhdimisht Netanyahun se refuzon të pranojë fajin për sulmin më vdekjeprurës në historinë e Izraelit. Por pak dihet për sjelljen e Netanyahut në ditët menjëherë pas sulmit, ndërsa kryeministri i ka rezistuar vazhdimisht një hetimi të pavarur shtetëror.
Duke folur për Kan, Feldstein ka thënë se "detyra e parë" që mori nga Netanyahu pas 7 tetorit 2023, ishte të shtypte thirrjet për llogaridhënie.
"Ai më pyeti: 'Për çfarë po flasin në lajme? A po flasin ende për përgjegjësi?'", ka thënë Feldstein. "Ai donte që unë të mendoja për diçka që mund të thuhej që do të kompensonte stuhinë mediatike rreth çështjes nëse kryeministri kishte marrë përgjegjësi apo jo".
Feldstein ka shtuar se Netanyahu dukej “i panikuar” kur bëri kërkesën. Feldstein ka thënë se më vonë se njerëz në rrethin e ngushtë të Netanyahut i kanë thënë të hiqte fjalën “përgjegjësi” nga të gjitha deklaratat.
Më 7 tetor 2023, militantët e udhëhequr nga Hamasi vranë rreth 1,200 njerëz në Izraelin jugor dhe morën 251 pengje në Gazë. Izraeli më pas nisi një luftë shkatërruese në Gazë që ka vrarë gati 71,000 palestinezë, sipas Ministrisë së Shëndetësisë së Gazës, e cila thotë se rreth gjysma e vdekjeve ishin gra dhe fëmijë.
Zyra e Netanyahut e ka quajtur intervistën një “seri të gjatë akuzash të rreme dhe të ricikluara të bëra nga një njeri me interesa të qarta personale i cili po përpiqet të shmangë përgjegjësinë nga vetja”, kanë raportuar mediat hebraike.
Deklaratat e Feldstein vijnë pas padisë së tij në një rast ku ai akuzohet për rrjedhjen e informacionit të klasifikuar ushtarak në një tabloid gjerman, për të përmirësuar perceptimin publik për kryeministrin pas vrasjes së gjashtë pengjeve në Gazë në gusht të vitit të kaluar.
Feldstein është gjithashtu i dyshuar për skandalin “Qatargate”, një nga dy ndihmësit e ngushtë të Netanyahut të akuzuar për pranimin e parave nga Katari ndërsa punonin gjithashtu për kryeministrin.