I dërguari i Trumpit mbërrin në Moskë për bisedime me Putinin

I dërguari special i presidentit të SHBA-së, Donald Trump, Steve Witkoff, ka mbërritur në Moskë të mërkurën, sipas pamjeve të televizionit shtetëror rus.

Media ruse raportoi vizitën e tij vetëm disa ditë para afatit të vendosur nga Shtëpia e Bardhë, që Rusia të arrijë një marrëveshje paqeje me Ukrainën, raporton AP.

Nëse marrëveshja dështon, Moska mund të përballet me penalitete të rënda ekonomike.

Moska nuk ka konfirmuar nëse Witkoff do të takohet me presidentin rus, Vladimir Putin.

Afati i fundit i Trumpit për Putinin përfundon të premten. Uashingtoni ka kërcënuar me tarifa të rënda dhe penalitete të tjera nëse operacioni ushtarak në Ukrainë vazhdon.

Deri më tani, premtimet, kërcënimet dhe bindjet e Trumpit nuk kanë arritur të ndryshojnë qëndrimin e Kremlinit, dhe ngërçi diplomatik vazhdon.