Gjermania e kufizon të drejtën e ribashkimit familjar për refugjatët

Ligjvënësit në Bundestag (dhoma e ulët e parlamentit gjerman) janë pajtuar të premten për të pezulluar të drejtën e refugjatëve, pa status të azilit, që të ribashkohen me familjet e tyre, teksa Qeveria e kancelarit konservator, Friedrich Merz, po synon ta adresojë çështjen e imigracionit të jashtëligjshëm, ka shkruar The Guardian.

Sipas legjislacionit të miratuar nga Bundestagu, procesi me të cilin familjarët e refugjatëve me mbrojtje plotësuese mund të aplikojnë për të ardhur në Gjermani, do të pezullohet për dy vjet.

Agjencia franceze e lajmeve (AFP) ka shpjeguar se refugjatët me mbrojtje plotësuese nuk kanë status të azilit, mirëpo atyre u mundësohet një e drejtë fillestare për të qëndruar në Gjermani për arsye të tjera, të tilla si kërcënimi me torturë ose dënimi me vdekje në vendin e tyre të origjinës.

Ministri i Brendshëm i Gjermanisë, Alexander Dobrindt, ka thënë para ligjvënësve se ndryshimi pasqyron prioritetin e qeverisë për “njerëzimin dhe rendin” në politikën e imigracionit.

“Edhe pse Gjermania mbeti e hapur ndaj botës, qëndrueshmëria e sistemeve tona shoqërore i ka kufijtë e saj”, ka thënë Dobrindt.

“Sistemet e arsimit, strehimit dhe kujdesit ishin të gjitha nën presion. Prandaj, imigracioni në Gjermani duhet të ketë gjithashtu kufijtë e tij”, ka shtuar ai.