Dhjetë ukrainas të liruar nga robëria ruse pas ndërmjetësimit të Vatikanit

Dhjetë ukrainas që ishin mbajtur të burgosur për vite me radhë u liruan nga robëria ruse me ndërmjetësimin e Vatikanit të premten dhe mbërritën në Kiev të shtunën.

Një pjesë e grupit mbërriti gjatë natës me helikopter në Aeroportin Ndërkombëtar të Kievit, i cili është mbyllur që kur Rusia nisi pushtimin në Ukrainë.

Ishte hera e parë në më shumë se dy vjet që aeroporti priti pasagjerë. Pjesa tjetër e grupit mbërriti me autobus.

Disa nga civilët e liruar ishin kapur para pushtimit të Rusisë, raporton AP.

Mes të liruarve ishte Nariman Dzhelyal, nënkryetari i “Mejlisit”, organ përfaqësues i tatarëve të Krimesë që u zhvendosën në Kiev pasi Rusia pushtoi gadishullin.

Dzhelyal u arrestua në Krimea ku jetoi pavarësisht aneksimit, një vit para luftës.

“Kushtet fizike janë shumë të tmerrshme dhe këta të burgosur kanë nevojë për ndihmë, ashtu si i gjithë vendi ynë”, ka thënë ai.

Në sallën kryesore të aeroportit, ish-të burgosurit të mbështjellë me flamuj blu dhe të verdhë u bashkuan me familjet e tyre.

Për disa, ndarja kishte zgjatur shumë vite.

Për gati gjashtë vjet, Isabella Pekh foli në konferenca ndërkombëtare dhe u bëri thirrje ambasadorëve të huaj për ndihmë për lirimin e nënës së saj, Olena Pekh, e cila u ndalua në pjesën e pushtuar të rajonit të Donetskut. Më në fund, përpjekjet e saj patën sukses.