Çfarë ndikimi do të ketë mbyllja e Qeverisë amerikane?

Qeveria federale e SHBA-së është mbyllur pasi ligjvënësit republikanë dhe demokratë nuk arritën të zgjidhnin një bllokim buxhetor të martën.

Bllokimi ndikon në financimin e operacioneve qeveritare deri në tetor dhe më tej, dhe mund të shkaktojë ndërprerje të gjera për amerikanët në fusha që variojnë nga udhëtimet ajrore deri te vizitat në kopshtin zoologjik.

Bllokimi politik pritet gjithashtu të çojë 40% të fuqisë punëtore federale, apo rreth 800,000 njerëz, në një suspendim të papaguar.

Si do të ndihet ndikimi i mbylljes në të gjithë vendin:

Fluturimi juaj i ardhshëm

Mbyllja federale do t'i godasë udhëtarët në një sërë mënyrash, duke çuar potencialisht në radhë të gjata sigurie dhe vonesa të shkaktuara nga kontrollorët e trafikut ajror të papaguar, që zgjedhin të qëndrojnë në shtëpi në vend që të punojnë falas.

Punonjësit e kontrollit të trafikut ajror dhe Administratës së Sigurisë së Transportit (TSA) konsiderohen "thelbësorë", kështu që ata do të vazhdojnë të shkojnë në punë në rast të një mbylljeje.

Por ata nuk do të paguhen derisa të përfundojë mbyllja. Gjatë mbylljes së fundit në vitet 2018-2019, këta punëtorë filluan gjithnjë e më shumë të lajmëroheshin të sëmurë, duke çuar në vonesa në aeroport. 

Ndikimi do të ndihet edhe nga amerikanët që planifikojnë të udhëtojnë jashtë vendit, teksa agjencitë amerikane të pasaportave paralajmërojnë se mund të duhet më shumë kohë se zakonisht për të përpunuar dokumentet e udhëtimit.

As punë as pagesë për punonjësit federalë

Pritet që punonjësit federalë të preken më rëndë, pasi nuk do të marrin asnjë pagë teksa mbyllja vazhdon.

Disa punonjës mund të zgjedhin të marrin punë të dyta, siç kanë bërë gjatë mbylljeve të mëparshme.

Punonjësit që nuk konsiderohen thelbësorë do të detyrohen të qëndrojnë në shtëpi. Në të kaluarën, këta punonjës janë paguar më pas në mënyrë retrospektive.

Disa agjenci, si Qendrat për Kontrollin dhe Parandalimin e Sëmundjeve dhe Institutet Kombëtare të Shëndetit, ka të ngjarë të pezullojnë shumë punonjës, duke ndikuar në kërkimet dhe eksperimentet e vazhdueshme që janë tashmë në zhvillim e sipër.

Presidenti Donald Trump, i cili ka shkurtuar shpenzimet qeveritare dhe ka shkurtuar vendet e punës federale që nga marrja e detyrës, paralajmëroi vazhdimisht se një mbyllje mund të përshpejtojë pushimet e mëtejshme nga puna dhe t'i lejojë atij të shkurtojë shërbimet dhe programet që ai thotë se janë të rëndësishme për Demokratët.

Kontraktorët, të cilët punojnë për agjencitë federale, por nuk janë të punësuar drejtpërdrejt nga qeveria, gjithashtu do të humbasin punë. Këta punonjës historikisht nuk kanë marrë asnjë pagesë të në mënyrë retroaktive, sipas Komitetit për një Buxhet Federal të Përgjegjshëm.

Parqe Kombëtare pa staf

Parqet Kombëtare dhe Pyjet Kombëtare janë mbyllur për vizitorët gjatë mbylljeve të kaluara, pasi rojeve dhe punonjësve të tjerë iu kërkua të qëndronin në shtëpi.

Gjatë mbylljes së fundit, administrata Trump mori vendimin për të lënë parqet të hapura, me pak ose asnjë punonjës federalë atje.

Sipas avokatëve të parqeve, vendimi çoi në vandalizëm në parqe, ndërsa vizitorët kalonin nëpër peizazhe të mbrojtura, plaçkitnin vende historike dhe hidhnin mbeturina të shumta.

Një grup prej më shumë se 40 ish-mbikëqyrësish parqesh i kanë bërë thirrje Shtëpisë së Bardhë që të mbyllë plotësisht parqet në rast të një mbylljeje.

"Ne nuk i lëmë muzetë të hapura pa kuratorë, ose aeroportet pa kontrollorë të trafikut ajror - dhe nuk duhet t'i lëmë parqet tona kombëtare të hapura pa punonjës të Shërbimit të Parqeve Kombëtare", ka thënë Emily Thompson e Koalicionit për Mbrojtjen e Parqeve Kombëtare të Amerikës.

Vizita në kopshtin zoologjik

Muzetë e famshme të Institutit Smithsonian të Uashingtonit do të qëndrojnë të hapura të paktën deri të hënën e ardhshme, më 6 tetor. Në faqen e internetit të Smithsonian, organizata ka thënë se kishte para në dispozicion nga vitet e mëparshme për ta ndihmuar atë të qëndronte e hapur.

Kafshët në Kopshtin Zoologjik Kombëtar "do të vazhdojnë të ushqehen dhe t’u ofrohet kujdes", sipas Smithsonian, i cili drejton kopshtin zoologjik.

Por kamerat do të fiken, pasi ato janë konsideruar jo thelbësore nga stafi i kopshtit zoologjik.

Pezullimi i transmetimeve do t'u ndërpresë shikuesve të shohin pandat, luanët, elefantët dhe minjtë e kopshtit zoologjik.

Kujdesi shëndetësor për të moshuarit dhe të varfrit

Medicare dhe Medicaid, programet e shëndetit social për të moshuarit dhe të varfrit, do të vazhdojnë, por mungesa e stafit mund të çojë në disa ndërprerje për shërbime të caktuara.

Ndihma emergjente në rast fatkeqësie pritet gjithashtu të mos preket kryesisht, megjithatë punët e tjera të kryera nga agjencitë e fatkeqësive do të preken.

Programi Kombëtar i Sigurimit për Përmbytjet do të mbyllet, duke vonuar disa hipoteka për pronat që kërkojnë politika nga programi i drejtuar nga qeveria.

Por nëse mbyllja zgjatet, është e mundur që Administrata Federale e Menaxhimit të Emergjencave (FEMA) të mbetet pa para për Fondin e saj të Ndihmës në Rast Fatkeqësish.

Programet e ndihmës ushqimore do të preken gjithashtu, teksa Programit të Ushqyerjes Plotësuese për Gratë, Foshnjat dhe Fëmijët (ËIC) pritet t’u mbarojnë shpejt fondet.

Programi i Ndihmës Plotësuese për Ushqyerjen pritet të vazhdojë për më gjatë, por është gjithashtu në rrezik të mbarojë fondet.