-
Përktheu:
Flutura Gashi-Mehmeti
- 28 dhjetor 2025 11:25
- Shpërndaje në:
Votuesit në Birmani u janë drejtuar të dielën kutive të votimit për fazën fillestare të zgjedhjeve të para të përgjithshme në pesë vjet, të mbajtura nën mbikëqyrjen e qeverisë së saj ushtarake, ndërsa një luftë civile po përhapet në pjesën më të madhe të vendit.
Rezultatet përfundimtare nuk do të dihen deri pas përfundimit të dy rundeve të tjera të votimit më vonë në janar.
Pritet gjerësisht që Min Aung Hlaing, gjenerali që ka qeverisur vendin me dorë të hekurt që nga marrja e pushtetit nga ushtria në vitin 2021, të marrë presidencën.
Qeveria ushtarake e ka paraqitur votimin si një kthim në demokracinë zgjedhore, por përpjekja e saj për legjitimitet është dëmtuar nga ndalimet e partive të opozitës që më parë ishin të njohura dhe raportet se ushtarët kanë përdorur kërcënimet për të detyruar votuesit të marrin pjesë.
Ndërsa më shumë se 4,800 kandidatë nga 57 parti po konkurrojnë për vende në legjislaturat kombëtare dhe rajonale, vetëm gjashtë po konkurrojnë në të gjithë vendin me mundësinë për të fituar ndikim politik në Parlament.
Partia e Solidaritetit dhe Zhvillimit të Bashkimit, e organizuar dhe e financuar mirë, me mbështetjen e saj nga ushtria, është deri tani pretendenti më i fortë.
Votimi po zhvillohet në tri faza, ku rundi i parë i së dielës do të mbahet në 102 nga 330 komunat e Birmanisë.
Faza e dytë do të zhvillohet më 11 janar dhe e treta më 25 janar. Rezultatet përfundimtare pritet të shpallen në shkurt.
Kritikët akuzojnë se zgjedhjet janë hartuar për t'i shtuar një fasadë legjitimiteti sundimit ushtarak që filloi kur ushtria rrëzoi qeverinë e zgjedhur të Aung San Suu Kyi në shkurt të vitit 2021. Kjo e bllokoi partinë e saj “Lidhja Kombëtare për Demokraci” nga shërbimi i një mandati të dytë pavarësisht se arriti fitore dërrmuese në zgjedhjet e vitit 2020.
Ata argumentojnë se rezultatet do të kenë mungesë legjitimiteti për shkak të përjashtimit të partive kryesore dhe kufizimeve në lirinë e fjalës dhe një atmosfere shtypjeje.