Beteja për mbijetesë në Kiev

Zëdhënësi i Ministrisë së Mbrojtjes ruse, Igor Konashenkov, pranoi të enjten se kishte në shënjestër objektet energjetike të Ukrainës. Por ai tha se ato ishin të lidhura me sistemin e komandës dhe kontrollit ushtarak të Ukrainës dhe se qëllimi ishte të prishnin furnizimin e ushtrisë, armëve dhe municioneve ukrainase në vijat e frontit. Autoritetet për Kievin dhe rajonin më të gjerë të Kievit raportuan gjithsej 7 persona të vrarë dhe dhjetëra të plagosur.

Banorët e kryeqytetit të bombarduar të Ukrainës kapën shishet bosh në kërkim të ujit dhe u grumbulluan në kafene për energji dhe ngrohje të enjten, duke kaluar në mënyrë sfiduese në modalitetin e mbijetesës pasi sulmet e reja raketore ruse një ditë më parë kthyen në terr qytetin dhe pjesën më të madhe të vendit.

Në skenat e vështira për t'u besuar në një qytet të sofistikuar prej 3 milionë banorësh, disa banorë të Kievit iu drejtuan mbledhjes së ujit të shiut nga gypat e kullimit, ndërsa ekipet e riparimit punonin për t’i rilidhur furnizimet.

Miqtë dhe familjarët shkëmbyen mesazhe për të zbuluar se kujt iu kishte kthyer rryma dhe uji. Disa kishin njërën, por jo tjetrën. Sulmi ajror i një dite më parë në rrjetin elektrik të Ukrainës la shumë njerëz pa asnjërën.

Kafenetë në Kiev u bënë shpejt oazë rehatie të enjten.

Oleksiy Rashchupkin, bankier investimi 39-vjeçar, u zgjua kur zbuloi se uji ishte rilidhur në banesën e tij në katin e tretë, por energjia jo. Frigoriferi i tij u shkri në errësirë, duke krijuar një pellg në dyshemenë e tij.

Kështu ai hipi në një taksi dhe kaloi lumin Dnieper nga bregu i majtë në të djathtë, në një kafene që ai kishte vënë re se kishte mbetur e hapur pas sulmeve të mëparshme ruse. Sigurisht, po shërbente pije të nxehta, ushqim të nxehtë dhe muzika dhe Wi-Fi ishin ndezur.

"Unë jam këtu sepse ka ngrohje, kafe dhe dritë”, tha ai. "Këtu është jeta".

Kievi në terr

Kryetari i Kievit, Vitali Klitschko, tha se rreth 70% e kryeqytetit ukrainas ishte ende pa energji të enjten në mëngjes.

Ndërsa Kievi dhe qytetet e tjera u ngritën, Khersoni të enjten u vu nën bombardimet më të rënda që kur forcat ukrainase rimorën qytetin jugor dy javë më parë. Breshëria e raketave vrau katër persona jashtë një kafeneje dhe një grua u vra pranë shtëpisë së saj, thanë dëshmitarët, duke folur për gazetarët e Associated Press.

Në Kiev, ku shiu i ftohtë ra mbi mbetjet e reshjeve të mëparshme të borës, gjendja shpirtërore ishte e zymtë, por e çeliktë. Dimri premton të jetë i gjatë. Por ukrainasit thonë se nëse qëllimi i presidentit rus, Vladimir Putin, është t'i thyejë ato, ai duhet të mendojë përsëri.

“Askush nuk do të komprometojë vullnetin dhe parimet e tij vetëm për energjinë elektrike”, tha Alina Dubeiko, 34 vjeç. Edhe ajo kërkoi komoditetin e një kafeneje tjetër, po aq të mbushur me njerëz, të ngrohtë dhe të ndezur. Pa energji elektrike, ngrohje dhe ujë në shtëpi, ajo ishte e vendosur të vazhdonte rutinën e saj të punës. Duke iu përshtatur jetës, pa rehati të zakonshme, Dubeiko tha se përdor dy gota ujë për t'u larë, më pas i kap flokët në bisht dhe është gati për ditën e saj të punës.

Ajo tha se do të preferonte të ishte pa energji sesa të jetonte me pushtimin rus, i cili kaloi kufirin nëntëmujor të enjten.

“Pa dritë apo ty? Pa ty”, tha ajo, duke i bërë jehonë komenteve të presidentit Volodymyr Zelenskky kur Rusia më 10 tetor lëshoi ​​të parin nga ato që tani janë bërë një seri sulmesh ajrore në infrastrukturën kryesore të Ukrainës.

Fushata ajrore

Udhëheqësit perëndimorë denoncuan fushatën e bombardimeve. “Sulmet kundër infrastrukturës civile janë krime lufte”, shkroi presidenti francez, Emmanuel Macron, në Twitter.

Zëdhënësi i Ministrisë së Mbrojtjes ruse, Igor Konashenkov, pranoi të enjten se kishte në shënjestër objektet energjetike të Ukrainës. Por ai tha se ato ishin të lidhura me sistemin e komandës dhe kontrollit ushtarak të Ukrainës dhe se qëllimi ishte të prishnin furnizimin e ushtrisë, armëve dhe municioneve ukrainase në vijat e frontit. Autoritetet për Kievin dhe rajonin më të gjerë të Kievit raportuan gjithsej 7 persona të vrarë dhe dhjetëra të plagosur.

Ambasadori rus i OKB-së, Vassily Nebenzia, tha: “Ne po kryejmë sulme kundër infrastrukturës në përgjigje të fluksit të shfrenuar të armëve në Ukrainë dhe thirrjeve të pamatura të Kievit për të mposhtur Rusinë”.

Zëdhënësi i Kremlinit, Dmitry Peskov, gjithashtu u përpoq ta transferonte fajin për vështirësitë civile te Qeveria e Ukrainës.

“Udhëheqja e Ukrainës ka çdo mundësi për ta rikthyer situatën në normalitet, ka çdo mundësi për ta zgjidhur situatën në mënyrë të tillë që t’i përmbushë kërkesat e palës ruse dhe, në përputhje me rrethanat, t'u japë fund të gjitha vuajtjeve të mundshme të popullatës civile”, tha Peskov. .

Në Kiev, njerëzit u rreshtuan në pikat publike të ujit për të mbushur shishet plastike. Në një kohë të çuditshme të re të luftës për të, punonjësja 31-vjeçare e Departamentit të Shëndetësisë, Kateryna Luchkina, iu drejtua mbledhjes së ujit të shiut nga një tub kullimi, në mënyrë që të paktën të lante duart në punë, të cilat nuk kishin ujë. Ajo mbushi dy shishe plastike. Një kolege e ndoqi pas saj, duke bërë të njëjtën gjë.

“Ne ukrainasit jemi kaq të shkathët, do të mendojmë diçka. Ne nuk e humbim shpirtin tonë”, tha Luchkina. “Ne punojmë, jetojmë në ritmin e mbijetesës apo diçka, sa më shumë që të jetë e mundur. Nuk e humbim shpresën se gjithçka do të jetë mirë”.

Kryetari i qytetit tha në Telegram se inxhinierët e energjisë "po bëjnë çmos" për të rikthyer energjinë elektrike. Ekipet e riparimit të ujit po përparonin gjithashtu. Në orët e para të pasdites, Klitschko njoftoi se furnizimet me ujë ishin rikthyer në të gjithë kryeqytetin, me paralajmërimin se "disa konsumatorë mund të përjetojnë ende presion të ulët të ujit".

Stabiliteti energjetik

Energjia, nxehtësia dhe uji po ktheheshin gradualisht edhe në qytetet e tjera. Në rajonin juglindor të Ukrainës, Dnipropetrovsk, guvernatori njoftoi se 3 mijë minatorë të bllokuar nën tokë për shkak të ndërprerjeve të energjisë ishin shpëtuar. Autoritetet rajonale postuan mesazhe në mediat sociale duke i përditësuar njerëzit për ecurinë e riparimeve, por gjithashtu duke thënë se kishin nevojë për kohë.

Duke qenë të vetëdijshëm për vështirësitë - si tani, ashtu edhe në të ardhmen, ndërsa dimri përparon - autoritetet po hapin mijëra të ashtuquajturat "pika të pathyeshmërisë" - hapësira me ngrohje dhe energji elektrike që ofrojnë ushqime të ngrohta, energji elektrike dhe lidhje interneti. Më shumë se 3.700 ishin hapur në të gjithë vendin të enjten në mëngjes, tha një zyrtar i lartë në zyrën presidenciale, Kyrylo Tymoshenko.

Në Kherson, spitalet pa energji dhe ujë po përballen gjithashtu me pasojat e tmerrshme të intensifikimit të sulmeve ruse. Ata goditën ndërtesat e banimit dhe komerciale të enjten, duke i vënë flakën disave, duke shpërthyer hi drejt qiellit dhe duke thyer xhama nëpër rrugë. Mjekët ndihmës kanë ndihmuar të plagosurit.

Olena Zhura po çonte bukë për fqinjët e saj kur një goditje që shkatërroi gjysmën e shtëpisë së saj plagosi bashkëshortin e saj, Viktorin. Ai u përpëlit nga dhimbja, ndërsa mjekët e larguan.

“Isha e tronditur”, tha ajo duke u përlotur. "Pastaj e dëgjova duke bërtitur: "Më shpëto, më shpëto".

Përktheu: Forca Jashari