Arrin në mbi 2,200 numri i të vdekurve nga tërmeti në Afganistan

Punonjësit e shpëtimit nxorën të enjten trupa nga rrënojat e shtëpive të rrafshuara nga tërmeti i fuqishëm në Afganistan, teksa numri i konfirmuar i të vdekurve ka shkuar në mbi 2,200.

Të mbijetuarit e pastrehë përballen me një të ardhme të zymtë pasi agjencitë globale të ndihmës kanë paralajmëruar kohë më parë pakësimin e burimeve.

Operacionet e kërkimit vazhduan në zonat malore lindore të goditura nga tërmeti, tha administrata talebane, duke njoftuar një numër të ri të të vdekurve prej 2,205, me të paktën 3,640 persona të lënduar, raporton Reuters.

"Gjithçka që kishim është shkatërruar", tha Aalem Jan, shtëpia e të cilit në provincën më të prekur të Kunarit u rrafshua nga dridhjet.

"Të vetmet gjëra që kanë mbetur janë këto rroba në shpinë", tha Jan një tjetër i prekur nga tërmeti.

Tërmeti i parë me magnitudë 6, një nga më vdekjeprurësit në Afganistan vitet e fundit, shkaktoi dëme të mëdha në provincat e Kunarit dhe Nangarharit të dielën, kur goditi në një thellësi të cekët prej 10 km.

Një tërmet i dytë me magnitudë 5.5 të martën shkaktoi panik dhe ndërpreu përpjekjet e shpëtimit pasi shkaktoi rrëshqitjen e shkëmbinjve poshtë maleve dhe bllokoi rrugët për në fshatrat në zonat e largëta.

Autoritetet kanë thënë se më shumë se 6,700 shtëpi janë shkatërruar.

E Kombet e Bashkuara kanë paralajmëruar se numri i viktimave mund të rritet, pasi njerëzit janë ende të bllokuar nën rrënoja, ndërsa koha për të mbijetuarit po mbaron.