“Personi i Vitit” për vitin 2025 nga revista Time nuk është zgjedhur vetëm një person. Revista kësaj herë ia ka dhënë titullin e figurës më me ndikim të vitit “arkitektëve“ të inteligjencës artificiale.
Bosi i Nvidias, Jensen Huang, kreu i Metas, Mark Zuckerberg, pronari i X-it, Elon Musk dhe pionierja e inteligjencës artificiale, Fei-Fei Li, janë në mesin e atyre që kanë zënë ballinën e revistës.
Ekspertët kanë thënë se kjo tregon se sa shpejt inteligjenca artificiale, dhe kompanitë prapa saj, po riformësojnë shoqërinë, raportoi BBC.
Ky titull jepet në kohën kur chatboti ChatGPT i OpenAI po vazhdon të përdoret me ritëm të shpejtë. Sipas kompanisë, chatboti i saj përdoret nga rreth 700 milionë njerëz çdo javë.
Kompanitë e mëdha teknologjike po derdhin miliarda dollarë në inteligjencë artificiale për të qëndruar në garë me konkurrentët.
Revista sivjet ka ndarë dy ballina për titullin “Personi i Vitit” – njëra shfaq shkronjat “AI” rrethuar nga punëtorë, dhe tjetra fokusohet në liderët teknologjikë.
Kryeredaktori i “Time”, Sam Jacobs, ka thënë se “askush” nuk ka pasur ndikim më të madh në vitin 2025 se sa “individët që imagjinuan, dizajnuan dhe e ndërtuan AI-në”.
Në vitin 1982, “Time” i pati dhënë të njëjtin titull kompjuterit me arsyetimin se amerikanët kishin një “pasion marramendës” për të.
