Ecuria e jashtëzakonshme e LeBron Jamesit, ku në 1297 ndeshje të stinorit të rregullt në NBA shënoi 10 e më shumë pikë, është ndalur të enjten pas mesnate.
Superylli i basketbollit u ndal në vetëm tetë pikë të realizuara në fitoren 123:120 të Los Angeles Lakersit ndaj Toronto Raptorsit.
Basketbollisti i Lakersit, i cili po luan në sezonin e 23-të në NBA, ndaj Raptorsit i shtoi edhe 11 asistime.
Për herë të fundit kur Jamesi nuk realizoi pikë dyshifrore ishte janari i vitit 2007.
Jamesi dështoi në gjuajtje nga loja e hapur duke realizuar vetëm katër herë në 17 tentime, ndërsa dështoi në pesë tentimet për tri pikë.
Në muajin mars, Jamesi u bë basketbollisti i parë që shënoi 50 mijë pikë në sezonin e rregullt në NBA dhe në ndeshjet e plejofit.
Austin Reaves shkëlqeu në këtë ballafaqim me dyshifrorë të dyfishtë prej 44 pikëve e 10 kërcimeve.