Kosova mposhtet nga Sllovakia në Prizren

Përfaqësuesja e Kosovës në basketboll ka nisur mirë, por megjithatë pësoi nga Sllovakia.

Të premten mbrëma në palestrën “Sezai Surroi” në Prizren, Kosova u mposht me rezultatin bindës, 89:78.

Për të dy përfaqësueset ishte ndeshja e dytë në raundin e parë të parakualifikimeve për Eurobasket 2029.

Kosova nisi mirë dhe çerekun e parë e fitoi me rezultatin 27:18. Por sllovakët shpërthyen në çerekun e dytë të cilin e fituan 30:15. Dhe më pas kanë mbajtur epërsi deri në fund. Kosova ia doli të afrohet, por pa rrezikuar ndonjëherë epërsinë e mysafirëve.

Kosova për herë të tretë ka luajtur me Sllovakinë, ndërsa e ka pësuar humbjen e tretë. Sllovakia është favorite e Grupit C dhe këtë e dëshmoi edhe të premten mbrëma në Prizren. Si Sllovakia ashtu edhe Kosova në nëntor kanë fituar ndaj Shqipërisë.

Kosova u paraqit pa dy lojtarët kryesorë, Dardan Berishën dhe Drilon Hajrizin. Dhe mungesa e tyre është vërejtur ndjeshëm. Prej lojtarëve të Kosovës gati gjysma kanë rol shumë të kufizuar në skuadrat e Superligës. Ndërkohë i vetmi që luan jashtë vendit është amerikani i natyralizuar, Divine Myles. Ai bënë karrierë në kategorinë e dytë franceze, ndërkohë që amerikani i Sllovakisë, David De Julius po shkëlqen në elitën spanjolle.

De Julius, që debutoi, “orkestroi” gjithë lojën e Sllovakisë. Po ashtu i realizoi 26 pikë, ndërsa bëri tetë asistime dhe tri kërcime.

Te Sllovakia shkëlqeu edhe 18-vjeçari Marosh Golian me 18 pikë e plot 18 kërcime. Ndërkohë 21 pikë i kishte Dalibor Hlivak.

Myles ishte më i dalluar te Kosova me 21 pikë, pesë kërcime e katër asistime. Lis Shoshi i realizoi 18 pikë e gjashtë kërcime, ndërsa Mikaile Tmushiq e përfundoi ndeshjen me 11 pikë, dy kërcime e dy asistime. Të tjerët i kishin më pak se 10 pikë.

Kosovës i ka munguar edhe përkrahja nga tribunat. Palestra ishte gjysmë e zbarëz.

Të përzgjedhurit e Bujar Locit ndeshjen e ardhshme e kanë më 2 korrik ndaj Shqipërisë. Ndërkohë ky cikël eliminator përfundon më 5 korrik me ndeshjen në udhëtim ndaj Sllovakisë. Vendi i parë në grup siguron avancimin në raundin e dytë parakualifikues. Avancon edhe përfaqësuesja më e mirë e vendit të dytë prej tri grupeve gjithsej. Përfaqësueset që dështojnë të kualifikohen kanë rast tjetër në raundin e tretë parakualifikues.

Kosova ndalet në çerekun e dytë, po pëson thellë nga Sllovakia

Pas çerekut të parë Kosova ishte duke udhëhequr 27:18, kurse pas të dytit po pëson 48:42.

Basketbollistët e Kosovës në dhjetëminutëshin e dytë të ndeshjes në Prizren janë dominuar plotësisht nga ata sllovakë.

Dhe tani po pësojnë me gjashtë pikë dallim.

Kosova në epërsi pas çerekut të parë 

Përfaqësuesja e Kosovës në basketboll po udhëheq 27:18 pas çerekut të parë të ndeshjes me Sllovakinë.

Ndeshja po luhet në Prizren, kurse palestra është gjysmë e zbrazët.

Kjo ndeshjet po luhet për kualifikimet e Evropianit të basketbollit. Është raundi i parë i kualifikimeve. Në këtë fazë luajnë 10 shtetet e ranguara më dobët.