Një gjykatë në Florida ka marrë vendim që detyron Teslën të paguajë 243 milionë dollarë për viktimat e një aksidenti fatal në vitin 2019 të një Model S të pajisur me autopilot, raportoi të shtunën Reuters.
Vendimi është një fitore e rrallë për viktimat e aksidenteve që përfshijnë autopilot.
Aksionet e Teslas kanë rënë me 1.8% të premten dhe me 25% këtë vit.
Anëtarët e jurisë në gjykatën federale të Miamit i kanë dhënë pasurisë së Naibel Benavides Leon, si dhe ish-të dashurit të saj Dillon Angulo, 129 milionë dollarë dëmshpërblim plus 200 milionë dollarë dëmshpërblim ndëshkues, sipas vendimit.
Tesla u mbajt përgjegjëse për 33% të dëmeve kompensuese, ose 42.6 milionë dollarë.
“Tesla e projektoi Autopilotin vetëm për autostradat me akses të kontrolluar, por me qëllim zgjodhi të mos i kufizonte shoferët ta përdornin atë diku tjetër” ka thënë Brett Schreiber, avokat i paditësve, në një deklaratë.
"Vendimi i sotëm përfaqëson drejtësi për vdekjen tragjike të Naibel dhe lëndimet e përjetshme të Dillon", shtoi ai.
Tesla e ka quajtur të gabuar vendimin dhe ka njoftuar se do të apelojë.
“Vendimi i sotëm është i gabuar dhe vetëm sa pengon sigurinë e automobilave dhe rrezikon përpjekjet e Teslës dhe të të gjithë industrisë për të zhvilluar dhe zbatuar teknologji shpëtimtare”, ka thënë kompania.
Paditësit kishin kërkuar 345 milionë dollarë dëmshpërblim. Avokatët e tyre thanë se gjyqi ishte i pari që përfshinte vdekjen e padrejtë e dikujt si pasojë e autopilotit.
Tesla është përballur me shumë padi të ngjashme në lidhje me aftësitë e automjeteve të saj për drejtim autonom, por ato janë zgjidhur ose janë hedhur poshtë pa u gjykuar.