Drejtori Ekzekutiv i Qendrës Kosovare për Studime të Sigurisë (QKSS), Mentor Vrajolli, ka paralajmëruar se tendencat për manipulim të zgjedhjeve në Kosovë, veçanërisht nga Serbia, përbëjnë kërcënim serioz për proceset demokratike në vend.
Sipas Vrajollit, partitë politike në Kosovë po përdorin gjithnjë e më shumë metoda dezinformimi për të ndikuar votuesit dhe për të deformuar konkurrencën zgjedhore. Ai shtoi se komuniteti serb në veri të vendit vazhdon të jetë nën presion politik, social dhe ekonomik, gjë që pengon pluralizmin dhe pjesëmarrjen e tyre të lirë në zgjedhje.
“Tendencat për manipulim, sidomos nga Serbia, tashmë janë evidente. Duket qartë se një parti fiton të gjitha votat dhe kjo parti është e lidhur me pushtetin në Serbi. Kjo pengon pluralizmin dhe mundësinë e krijimit të subjekteve të pavarura politike”, ka thënë Vrajolli për “EkonomiaOnline”.
Ai paralajmëroi gjithashtu për ndikimin e dezinformimit në rrjetet sociale, duke theksuar se përdorimi i postimeve të manipuluara ose të gabuara po rritet dhe kërcënon demokracinë.
“Qytetarët duhet të jenë të informuar për të votuar në përputhje me interesat e tyre, por infrastruktura dhe mënyrat e dezinformimit po e bëjnë këtë shumë të vështirë”m shtoi ai.
Vrajolli theksoi se Serbia ka mekanizma të fuqishëm për të kontrolluar votën e serbëve të Kosovës, duke përdorur presione politike dhe ekonomike, si dhe kërcënime indirekte ndaj familjarëve dhe komunitetit. Kjo, sipas tij, krijon pabarazi në garën zgjedhore dhe bie ndesh me ligjin për financimin e partive politike.
“Mendoj që komuniteti në pjesën veriore është në mes të një numri të madh të presioneve, mendoj që një nga presionet më të mëdha dhe të vazhdueshme kanë qenë që ata të mos integrohen në shoqërinë kosovare dhe çdo tendencë e tyre për t’u integruar është ndëshkuar por edhe në rast se nuk është arritur të ndëshkohet është shkelje e identitetit të tyre dhe kundër vlerave nacionaliste që ata promovojnë edhe në një farë forme i ka dëmtuar ata si individ. Kështu që mendoj që ky është një nga sfidat që ata kanë për këtë arsye duke u dëshmuar edhe nga zgjedhjet e kaluara se është pothuajse e pamundur me kriju partitë e tyre të cilat përfaqësojnë interesat e tyre që të marrin pjesë në zgjedhje për shkak se jo domosdo duhet të jetë presioni fizik ndaj tyre”, shtoi ai.
Vrajolli vuri në dukje mungesën e vullnetit politik për të luftuar seriozisht dezinformimin dhe theksoi nevojën që partitë të bazojnë fushatat e tyre në plane dhe programe reale, jo në manipulime dhe lajme të rreme, për të siguruar një proces zgjedhor të drejtë dhe të besueshëm.
“Mendoj që nuk di sa janë përgatitur por me më rëndësi me pa se sa kemi vullnet për faktin se dezinformimin janë duke përfituar të gjithë edhe mendoj që më tepër është ajo droja nëse dikush po e shfrytëzon më mirë sesa dikush tjetër platformat e dezinformimit sesa dëmi i përgjithshëm që shkaktohet. Kështu që nuk duket se ka ndonjë tendencë apo iniciativë serioze nga e cilado palë të luftohet dezinformata, dezinformatë janë duke bërë të gjithë mbase shpeshherë përdoren mjetet tradicionale të informimit dhe shpeshherë edhe rrjetet sociale të përfshira në dezinformim dhe lajthitje të opinionit publik. Më duket se janë kyçur të gjithë dhe kjo mendoj që duhet të trajtohet si shqetësuese për qytetarët. Është jashtëzakonisht me rëndësi me dëgju platformat që kanë partitë politike që me tregu që ata janë duke u brengosur për interesat e qytetarëve që i njohin problematikat e qytetarëve. Mendoj që këtu duhet të bazohet e gjitha kampanja e partive politike dhe po qëse partitë politike arrijnë të shpjegojnë planet e tyre, programet e tyre që kanë, atëherë mendoj që është më lehtë për të fituar vota sesa përmes mekanizmave të lajthitjes së opinionit të qytetarëve”, ka thënë ai.