-
Nga:
Nexhat Tovërlani
- 9 janar 2023 15:57
- Shpërndaje në:
Të dështuar po e konsideron Lëvizja Vetëvendosje projektin e shtëpizave të vendosura në qytetin e Obiliqit. Sipas zyrtarëve të saj, ky projekt që ka kushtuar rreth 33 mijë euro nuk është funksionalizuar asnjëherë deri tash. Shefi i Grupit të këshilltarëve të kësaj partie, Sami Ahmeti, ka theksuar se ky projekt është bërë pa një planifikim të mirëfilltë paraprak.
“Edhe në njërën nga seancat e Kuvendit Komunal në Obiliq, si këshilltarë nga radhët e Lëvizjes Vetëvendosje e kemi ngritur çështjen e këtyre shtëpizave që shumica e tyre janë vendosur në hapësira të gjelbra dhe nuk janë duke u shfrytëzuar. Edhe pse ishin vendosur në muajt e verës, përfaqësuesit e ekzekutivit na thanë që janë të parapara për aktivitetet e fundvitit. E tash kaloi fundviti dhe asnjëra prej tyre nuk është marr në shfrytëzim”, ka deklaruar Sami Ahmeti.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Arsyet për mosshfrytëzimin e tyre janë të shumta: janë bërë pa hulumtim paraprak të nevojave, mos planifikimi i duhur dhe më e keqja kemi informata nga qytetarët që për marrjen e tyre u është kërkuar të japin mito. Këto shtëpiza që janë gjithsej 10 sosh, sipas kontratës komunës i kanë kushtuar 30000€ e në ndërkohë është bërë edhe një aneks kontratë në vlerë 2990€”.
Krejt ky investim, sipas këshilltarit të VV-së, është bërë në koordinim me operatorin ekonomik dhe vetëm në favorin e tij pa e ditur se a ka vërtet komuna nevoja të tilla.
“Ne kemi shumë kategori tjera që kanë nevoja imediate për investime si p.sh. laboratorët dhe kabinetet në shkolla, e shumë prej shkollave kanë mungesë të letrave, fotokopjuesve, printerëve etj., e që me këto mjete që janë harxhuar kot do të mund të përmirësohej gjendja në to. Ky është vetëm njëri nga projektet e dështuara të kësaj komune e që kohëve të fundit për shkak të aferave të shumta korruptive është bërë vendqëndrim i Policisë së Kosovës, respektivisht njësisë për krime ekonomike”, ka thënë ai.
Ndërkohë, drejtori për Shërbime Publike dhe Emergjencë, Abdyrrahman Krasniqi, ka thënë se vendimi i Qeverisë për të mos dekoruar sheshet e ka zbehur interesimin e qytetarëve për t’i marrë në shfrytëzim këto shtëpiza.
“Shtëpizat janë menduar për festat e fundvitit dhe ditët e diasporës. Pak ka pasur të interesim nga bizneset e qytetarët, duke pas parasysh vendimin e Qeverisë për të mos dekoruar sheshet, ne si komunë e kemi respektuar. Kemi pas tri biznese që kanë aplikuar, dy nga to i kanë nënshkruar kontratat, por pas vendimit të qeverisë për të mos i dekoruar sheshet është zbehur interesimi”, ka thënë Abdyrrahman Krasniqi.
Ai e ka mohuar se dikujt i është kërkuar mito në këmbim të dhënies në shfrytëzim të këtyre shtëpizave.
“Sa i përket pyetjes si dikujt i është kërkuar mito, kjo nuk qëndron edhe nëse ka diçka të tillë bashkërisht me VV-në shkojmë dhe e paraqesim te organet e rendit”, ka thënë ai.