Udhëheqës shtetërorë kërkojnë zbardhjen e fatit të personave të zhdukur me dhunë

Udhëheqës shtetërorë i adresuan thirrje Bashkimit Evropian t’i ushtrojë presion Serbisë për zbardhjen e fatit të të pagjeturve, në Ditën Ndërkombëtare të Viktimave të Zhdukjes me Forcë. Gjatë homazheve në Memorialin për të pagjeturit, presidentja Vjosa Osmani e akuzoi Serbinë për shkeljen e të gjitha konventave për të drejtat e njeriut

Thirrje shtetit të Serbisë për zbardhjen e fatit të personave të zhdukur me dhunë në Kosovë ka adresuar presidentja Vjosa Osmani, në shënimin e Ditës Ndërkombëtare të Viktimave të Zhdukjes me Forcë.

Tek ka bërë homazhe te Monumenti i Personave të Zhdukur, bashkë me udhëheqës të tjerë shtetërorë e me ambasadorë të akredituar në Kosovë, Osmani e ka akuzuar Serbinë për shkelje të të gjitha konventave ndërkombëtare për të drejtat e njeriut. “Jemi bashkë me familjet për ta ngritur zërin tonë për drejtësi, për ta ngritur zërin tonë për këtë krim të vazhdueshëm të Serbisë dhe e them që është krim i vazhdueshëm, sepse përtej krimeve që janë kryer në vitin 1998-99 nga ana e Serbisë, zhdukja me dhunë e personave të dashur të shumë familjeve këtu në Kosovë është krim të cilin e kryen çdo ditë, duke i mbajtur ata në varreza masive, duke mos i respektuar marrëveshjet e arritura në Bruksel për ta zbardhur fatin e këtyre të zhdukurve me dhunë”, ka deklaruar presidentja Osmani.

E kryetari i Kuvendit, Dimal Basha, ka thënë se zbardhja e fatit të të zhdukurve është obligim moral dhe ndërkombëtar i Serbisë, porse edhe përgjegjësi e bashkësisë ndërkombëtare.

“Ky është një obligim moral, por edhe obligim ndërkombëtar që Serbia sa më parë ta tregojë vendndodhjen e të gjithave masakrave dhe vendndodhjen se ku gjenden të pagjeturit që familjet në vendin tonë mezi presin ta kuptojnë fatin e tyre. Është çështje morale, por edhe obligim ndërkombëtar që Serbia të tregojë sa më shpejt, bëj thirrje edhe te bashkësia ndërkombëtare që të shtojë presion te një regjim autoritar atje që të tregojë për fatin e të pagjeturve dhe të kuptojmë për fatin e tyre”, është shprehur kryeparlamentari Basha.

Kritika ndaj Serbisë ka adresuar edhe kryeministri në detyrë, Albin Kurti. Ai tha se shteti serb është duke e penguar procesin e kërkimit të mbetjeve mortore të viktimave të luftës, duke mos i nisur gërmimet e paralajmëruara.

“Gërmimet në Kozhle të Serbisë nuk kanë filluar ende, ndërkaq në Batajnicë, afër Beogradit, nuk kanë rifilluar ende, pa çka se u bënë dy vjet që ne e kemi edhe marrëveshjen e Brukselit edhe deklaratën përkatëse për këtë çështje. Mohimi i drejtësisë ndaj viktimave tona të luftës së fundit në fakt paraprihet nga mohimi i krimeve të kryera nga Serbia që e bën Beogradi zyrtar”, ka thënë kryeministri Kurti.

Gjatë luftës së viteve 1998-1999, në Kosovë janë vrarë rreth 13 mijë persona, janë zhvendosur mbi 800 mijë, ndërsa janë zhdukur me forcë rreth 6 mijë, 1 mijë e 600 prej të cilëve janë ende të pagjetur.

Më 2 maj të 2023-s, kryeministri Albin Kurti dhe presidenti i Serbisë, Aleksandër Vuçiq, e nënshkruan, në kuadër të dialogut të Brukselit, Deklaratën për të Pagjeturit dhe e bënë zotimin ta lejojnë qasjen në të gjitha dokumentet në posedim të tyre. Por arkivat e Ushtrisë dhe të Policisë së Serbisë deri më tani kanë mbetur të paqasshme për autoritetet në Kosovë.