Transportuesit urbanë protestojnë edhe të hënën

Protesta e transportuesve urbanë në Prishtinë do të vazhdojë edhe të hënën, pasi borxhi nga Komuna ende nuk është kryer, pavarësisht vendimit të së enjtes së Kuvendit Komunal për bartjen e të hyrave vetjake. Përfaqësuesit e transportuesve paralajmëruan se protestat do të vazhdojnë deri në momentin kur paratë të alokohen në llogaritë e tyre.

Protesta e transportuesve urbanë në kryeqytet pritet të vazhdojë edhe të hënën para Komunës së Prishtinës.

Tash e një javë qytetarët nuk kanë mundur ta shfrytëzonin trafikun urban për të udhëtuar shkaku i borxheve që u ka Komuna e Prishtinës atyre.  

Pavarësisht se të enjten, në seancën e jashtëzakonshme të Kuvendit Komunal, është miratuar bartja e mjeteve vetjake, përfaqësues të trafikut urban dhe atyre privatë theksuan se protestat do t’i vazhdojnë derisa mjetet financiare t’u dalin në llogaritë bankare.

“Ne nesër jemi në grevë. Në momentin që mjetet, pra shuma e borxhit, alokohen nga Komuna tek “Trafiku Urban”, greva ndërpritet. Komuna e ka borxhin tonë 3.3 milionë euro. Prej tyre 680 mijë euro janë alokuar para 3–4 ditësh, aq sa ka pasur mundësi Komuna. Ndërsa pjesa tjetër, rreth 2.7 milionë euro, ende nuk është alokuar. Nesër, pasnesër, kurdo që mjetet alokohen, ne e fillojmë punën; deri atëherë, jemi në grevë”, ka thënë Ilmi Gashi, përfaqësues i sindikatës së Trafikut Urban.

“Protesta vazhdon prapë. Që nga nesër, prej orës 10:00 deri në 12:00, jemi në protestë derisa të alokohen mjetet dhe t’u kalohen kompanive në xhirollogari. Duhet që Kuvendi Komunal ta dërgojë vendimin në Ministrinë e Financave për bartjen e të hyrave vetjake nga 2024 në 2025, Ministria t’i alokojë 28 milionët, dhe Komuna t’i kryejë obligimet që ka ndaj nesh”, ka thënë Izet Smajli, kryetar i shoqatës së transportit privat “Uni Trans”.

Edhe kryeshefi ekzekutiv i “Trafikut Urban”, Qëndrim Vitija, tha se presin që të hënën të paguhet i gjithë borxhi që Komuna ka ndaj ndërmarrjes.

“Shpresoj që nesër të përfundojë gjithçka dhe mjetet të dalin në xhirollogarinë e ndërmarrjes dhe të punëtorëve, sepse pa u ekzekutuar mjetet është e pamundur të kryhen shërbimet. Ne kemi kërkuar të na paguhen të gjitha faturat, që do të thotë të paktën deri te fatura e tetorit, sepse faturën e nëntorit ende nuk e kemi dorëzuar. Nëse do të paguhej fatura e tetorit, gjithçka do të ishte në rregull”, ka thënë Vitija.

Transportuesit kanë nisur protestat që nga e hëna, pasi Komuna e Prishtinës nuk ka arritur të shlyejë obligimet financiare si pasojë e mosmiratimit të buxhetit me kohë.

Në shenjë proteste ata kanë vendosur autobusët para objektit të Komunës, duke kërkuar zgjidhje.