Në podcastin PIKË, profesori dhe ish-deputeti Faton Topalli diskutoi me publicistin Veton Surroi për marrëdhëniet historike mes Kosovës dhe Shqipërisë në lidhje me kërkesat për Republikë dhe lidhjet politike gjatë periudhës jugosllave.
VIDEO:
Topalli theksoi se, ndonëse Shqipëria dhe Kosova ndanin lidhje kulturore dhe kombëtare, Tirana nuk ka mbështetur më herët kërkesën për Republikë të Kosovës.
“Shqipëria nuk ka qenë e interesuar që Kosova të kishte Republikën e saj më parë dhe nuk ka tentuar të fusë këtë kërkesë nëpër grupe apo garnitura”, ka thënë ai.
Në bisedë u përmend edhe pozicioni historik i Enver Hoxhës, i cili sipas Surroit, në takimin e parë me Titon deklaroi se territoret shqiptare janë “punë e brendshme e Jugosllavisë”.
Topalli shtoi se Shqipëria kishte një tendencë të hershme për bashkim me Jugosllavinë si Republikë e shtatë brenda federatës.
Por Surroi tregoi se kjo ide që u prish në vitin 1947 nga Stalini për arsye të kontrollit strategjik.
“Ky projekt bashkimi ishte pjesë e planeve operative të kohës, por u ndalua nga Stalini që nuk donte të krijohej një territor që ai nuk do të mund ta kontrollonte”, përfundoi Surroi.
