Në konferencën për situatën energjetike në Kosovë, ministrja në detyrë e Ekonomisë, Artane Rizvanolli, ka deklaruar se po flitet për “mafinë energjetike” në Ballkan por, sipas saj, asnjëri institucion i Kosovës s’ka lidhje me të.
Sipas Rizvanollit, kjo mafi mund të ekzistojë në Ballkan dhe ta ketë selinë në Beograd.
“Nuk kam folur për të sepse është aq pa lidhje dhe e pabazë, sa s’më është dukur e denjë ta them. S’po ndalen disa duke e thënë. Mafia energjetike në Ballkan mund të ekzistojë, e të ketë selinë në Beograd, por asnjë institucion i Kosovës s’ka asnje raport, lidhje apo kontakt me të, as shoqëror e as biznesor, e as kurrfarë. Absurde që ta them pasi ata që akuzojnë, s’kanë asnjë fije fakti për atë që e thonë”, ka thënë Rizvanolli.
Sipas ministres në detyrë, ata që akuzojnë për “mafi energjetike”, shpërndajnë dezinformata “për qëllime që vetëm ata mund t’i dinë”.
“Prej tyre s’mund të presim të jenë korrektë, por ju lus që të mos i merrni të mirëqena të gjitha deklarimet që i lexoni, por t’u referoheni informatave zyrtare nga kompanitë përgjegjëse”, ka thënë ajo.
Rizvanolli i ka quajtur “dezinformata” raportimet që Kosova ka qenë në kolaps energjetik dhe shtoi se KEK-u në asnjë moment s’ka qenë pa prodhim.
Ajo tha se Kosova ka sfida në sektorin energjetik.
“Ne kemi sfida të sektorit energjetik, sepse siguria e furnizimit varet nga termocentralet 62 e 42 vjeçare, sepse s’janë bërë kurrë rehabilitime të tyre. Arsyeja pse s’i kemi nga prilli të gjitha blloqet është që për herë të parë, në Kosovën B po i modernizojmë turbinat dhe blloku 2 është jashtë funksionit, për t’i kryer këto për 6 muaj. Kjo është sakrificë e përkohshme, por e domosdoshme dhe duhet ta bëjmë tash sepse s’e kanë bërë me kohë, kur çmimet e importit kanë qenë trefish dhë më të lira”, ka shtuar ministrja në detyrë.
