Paneli Zgjedhor për Ankesa dhe Parashtresa ka refuzuar kërkesën e Partisë Demokratike të Kosovës që të ketë përsëritje të procesit zgjedhor në Mitrovicë të Jugut. PDK-ja ishte ankuar për fletëvotimet e përziera ndërmjet klasave dhe çështjes së numrit serik në fletëvotime.
Megjithatë, PZAP-ja e ka cilësuar të pabazë ankesën duke thënë se ankuesi nuk ka prezantuar prova për t’i dëshmuar parregullsitë dhe se pas hetimeve nga Komisioni Qendror i Zgjedhjeve ka rezultuar që numri i të gjitha fletëvotimeve të vlefshme, të pavlefshme dhe të dëmtuara përputhet me numrin e fletëvotimeve të pranuara nga Këshilli i Vendvotimit.
Paneli ka thënë se kërkesa që të përsëriten zgjedhjet në të gjithë territorin e Mitrovicës janë të pathemelta.
PZAP-ja ka vlerësuar se nuk ka pasur cenim të integritetit të zgjedhjeve “jo pasi që nga provat e ekzistuese rezulton se ka ekzistuar vetëm gabim teknik në kodin e fletëvotimit në vendvotim, ndërsa numri serikë dhe elementet e tjera që kanë qenë të domosdoshme për sigurinë e fletëvotimit kanë ekzistuar në secilin fletëvotim, ashtu siç është përcaktuar edhe me Rregulloren Zgjedhore KQZ-së 10/2024 fletëvotimet dhe Broshurat dhe plotësim ndryshimi i kësaj Rregullore me Rregulloren nr. 01/2025”.
Sipas Panelit nuk qëndron as pretendimi për “Tren Bullgar”.
PDK-ja i ka dy ditë kohë që të ankohet në Gjykatën Supreme ndaj këtij vendimi.
PDK-ja paralajmëron ankesë në Supreme për rivotim në Mitrovicë
Partia Demokratike e Kosovës ka paralajmëruar ankesë në Gjykatën Supreme pasi Paneli Zgjedhor për Ankesa dhe Parashtresa (PZAP) refuzoi ankesën e saj lidhur me parregullsitë e pretenduara në procesin zgjedhor në Mitrovicën e Jugut.
Në reagimin e partisë thuhet se vendimi i PZAP-it është “i padrejtë dhe i pambështetur në realitetin e asaj që ka ndodhur në Mitrovicë”.
Sipas PDK-së, gjatë ankesës janë paraqitur prova dhe dëshmi që, siç pretendohet, tregojnë se procesi zgjedhor është cenuar dhe se vullneti i qytetarëve nuk është respektuar sipas ligjit dhe standardeve demokratike.
PDK-ja ka bërë të ditur se nuk do të ndalet me këtë vendim dhe se do të vazhdojë me hapat ligjorë.
Partia ka paralajmëruar se ankesa e radhës do të dorëzohet në Gjykatën Supreme, si instanca përfundimtare për shqyrtimin e çështjeve zgjedhore.
“PDK është dhe mbetet në mbrojtje të votës së lirë, të drejtë dhe të pastër të qytetarëve. Ne kërkojmë vetëm respektimin e ligjit dhe të vullnetit të shprehur të qytetarëve të Mitrovicës”, thuhet në reagim.