Politikani ukrainas, Vadym Chernysh, ka deklaruar se shpreson që së shpejti të ndodhë njohja e shtetit të Kosovës nga Ukraina, duke shtuar se së fundmi ka pasur diskutime të mëdha në opinionin publik.
Ai është shprehur të enjten në “Interaktiv” të KTV-së se pas përfundimit të luftës mes Ukrainës dhe Rusisë “duhet të bëjmë shumë gjëra së bashku me kosovarët në nivele të ndryshme”.
“Shoh disa ndryshime në opinionin publik, kështu që shpresoj se do të ndodhë së shpejti. Pas përfundimit të konfliktit, besoj se duhet të bëjmë shumë gjëra së bashku me kosovarët në nivele të ndryshme, për shembull, midis akademisë, OJQ-ve, kontakteve njerëzore, për të na çuar drejt suksesit, për të qenë miq të ngushtë. Dua të them, si vende, jo vetëm si popullsi”, ka thënë ai.
Sipas politikanit nga Ukraina, sfida është që të përhapet kjo çështje dhe të mos ketë vëmendje për satelitët rusë.
“Pra, kjo është sfida ime gjithashtu t'iu shpjegoj sa më shumë ukrainasve që të mundem, edhe përmes mediave tona, se duhet ta bëjmë më shumë për raportin me Kosovën dhe të mos u kushtojmë vëmendje satelitëve rusë”, ka shtuar ai.
Chernysh: Kosova na ndihmoi shumë, paçka se është e kërcënuar
Politikani nga Ukraina, Vadym Chernysh, ka deklaruar se çmon ndihmën që autoritetet e Kosovës ia bënë Ukrainës për t’u përballur me agresionin rus, teksa shtoi se beson që edhe Kosova është vend i kërcënuar.
Ai ka thënë të enjten në “Interaktiv” të KTV-së se Serbia ndihmoi ushtarakisht Ukrainën por në këmbim të parave, teksa tha se Kosova e ndihmoi pa pagesë. Chernysh e cilësoi shtet totalitar Serbinë, teksa për liderin Aleksandar Vuçiq, tha se tentoi t’i manipulonte shtetet evropiane.
Për Serbinë, politikani ukrainase tha se merr para nëpërmjet grupeve kriminale “veçanërisht në Ballkan”.
“Z. Vuçiq dhe ekipi i tij, jo qeveria e tij, por ekipi i tij, sepse ky është më shumë stil si në shtete totalitare, ku ai ka pozicionin e presidentit dhe ekipit të tij ose regjimit të tij. E dini, do të thosha se nuk janë thjesht liberalë dhe kanë tendencë të jenë më autokratikë. Ata u përpoqën të manipulonin opinionin publik në Evropë për t'i demonstruar ato, kur nga njëra anë ke një qëllim integrimin evropian, por në të njëjtën kohë të jenë aleatë të vërtetë të Moskës. Kështu që problemi është se ne duhet, dua të them, ukrainasit duhet të shpjegojnë më shumë rreth qëllimit të vërtetë dhe të mendojnë vërtet për të vërtetën e sjelljes serbe dhe të nxjerrin në pah disa veprime të mbuluara, dua të them dhe lloje të tjera mbështetjeje që Serbia u ka dhënë Rusisë dhe politikës ruse. Dhe meqë ra fjala, shumë njerëz thonë se Serbia na dha armatime neve ukrainasve. Por ata e bënë këtë në këmbim të parave, jo falas, jo si Kosova. Jo si vendet e tjera, kështu që ata morën para. Si gjithmonë, ata marrin para nga kudo përmes organizatave të tyre kriminale dhe veçanërisht në Ballkan”, ka deklaruar ai.
Ai shtoi se Kosova i dha shumë mbështetje Ukrainës, paçka se “është shtet shumë i vogël”.
“...E dini, vendi juaj është shumë i vogël, shumë i vogël dhe edhe ju ishit nën kërcënim, ndoshta jo të gjithë njerëzit do ta kuptojnë këtë. Nuk e di saktësisht, ju e njihni vendin tuaj më mirë se unë. Por edhe ju jeni nën kërcënim dhe, duke qenë nën kërcënim, qeveria juaj dhe presidenti juaj e kuptojnë shumë mirë këtë. Dhe edhe në këto rrethana, na dhatë shumë mbështetje dhe ne e vlerësojmë këtë. Dhe ndonjëherë keni nevojë për më shumë mbështetje, madje edhe morale nga zemra juaj, në mënyrë që të ngrini moralin”, ka thënë Chernysh.
Ai ka folur edhe për mercenarët serbë që luftojnë krah trupave ruse në Ukrainë, duke e ndërlidhur me vizitën e presidentit serb, Aleksandar Vuçiq, në Moskë.
Sipas Chernyshit, Ukraina duhet të ketë parasysh edhe njohjen e Republikës së Kosovës.
“Ka shumë mercenarë serbë në ushtrinë ruse dhe shumë mbështetje morale për ta. Ka shumë mbështetje morale ndaj Moskës. Refuzimi për të zbatuar disa sanksione ose për të vendosur disa sanksione ndaj Rusisë dhe lloje të tjera mbështetjeje për oficerët rusë në Serbi, pasaportat e Serbisë për rusët e pasur për të udhëtuar nëpër Evropë, sepse rusëve u ndalohet hyrja në Evropë. Pra, të gjitha ato gjëra dhe me këtë paradën në Moskë janë të rëndësishme për ukrainasit, në mënyrë që të jenë më afër njohjes së pavarësisë së Kosovës. Ne jemi përgjegjës, si politikanë, organizata joqeveritare përgjegjëse për të promovuar këtë ide”, ka thënë ai.
Politikani ukrainas kërkon prani ndërkombëtare si alternativë ndaj anëtarësimit në NATO
Politikani ukrainas, Vadym Chernysh, ka deklaruar në vend të mosanëtarësimit të Ukrainës në NATO, ky shtet do të kërkonte garanci shtesë mbi sigurinë, në mënyrë që t’ia pamundësonte Rusisë kthimin.
Ai ka thënë të enjten në “Interaktiv” të KTV-së se një ushtri e madhe me shumë armatim dhe me siguri ushtarake të vendeve të NATO-s do të mund të ishte opsion i një garancie shtesë për Ukrainën.
“Një ushtri e madhe, me shumë armë, veçanërisht armë me rreze të gjatë veprimi, inteligjencë dhe mbështetje tjetër, dhe ndoshta disa kontingjente ndërkombëtare për shembull në pjesën perëndimore të Ukrainës. Francezët ose britanikët mund të qëndrojnë atje si forca parandaluese në mënyrë që të zëvendësojnë disa ukrainas që mund të shërbejnë më afër vijës së kontaktit dhe kufirit rus. Pra, kjo mund të jetë zgjidhja. Zgjidhje shtesë”, ka deklaruar Chernysh.
Ai është shprehur se do të ishte shumë e vështirë të vazhdohej lufta pa mbështetjen e Shteteve të Bashkuara të Amerikës, por tha se s’do të ishte e pamundur. Sipas zyrtarit ukrainas, ushtrisë ukrainase do t’i duhej një periudhë riformatimi “për të mbledhur inteligjencë nga mjetet e tjera”.
“Pa Shtetet e Bashkuara do të ishte e vështirë të vazhdohej lufta, por është e mundur. Pra, na duhen disa muaj për të ndryshuar, do të thosha, kanalet tona për të mbledhur inteligjencë me mjete të tjera. Me aftësitë tona të aleatëve tanë evropianë, na duhet pak kohë për të riorganizuar ushtrinë tonë për të ndryshuar qasjen tonë. Po krijojmë të ashtuquajturën linjë dronësh, ku zona e vrasjes duhet të jetë afërsisht 25 kilometra e siguruar nga dronë ukrainas, në mënyrë që kjo të jetë më e vështirë, por e mundur”, ka shtuar ai.
Chernysh ka shtuar se shumë trupa ruse shkatërrohen çdo ditë, derisa u shpreh se “rusët paguajnë mesatarisht 1.200 jetë ushtari çdo ditë”.
“Mendoj se mund të zëvendësojmë disa personel ushtarak. Me anë të mjeteve dhe pajisjeve teknike, kjo do të thotë që nëse keni shumë dronë të ndryshëm, si detarë, dhe pastaj sistemin në ajër dhe në tokë, pra mund të zëvendësoni disa njerëz në mënyrë që, prandaj, t'i kushtoni vëmendje faktit se për çdo 100 metra, llogarisni figurativisht 100 metra territor ukrainas çdo ditë, ata paguajnë me jetën e tyre. Dua të them se rusët paguajnë mesatarisht 1.200 jetë çdo ditë. Pra, kjo nuk ka të bëjë vetëm me Ukrainën. Ka të bëjë edhe me Rusinë”, ka thënë ai.
