-
Nga:
Rrezon Gashi
- 20 qershor 2024 19:28
- Shpërndaje në:
Janë liruar nga akuza për keqpërdorim me vota ish-kandidati për deputet i LDK-së, Shkumbin Gashi, dhe i akuzuari tjetër Sylë Balaj. Vendimin e quajtën të drejtë avokatët e të akuzuarve, madje thanë se aktakuza u bë për motive politike.
Ish-kandidati për deputet nga radhët e Lidhjes Demokratike, Shkumbin Gashi, dhe i akuzuari tjetër Sylë Balaj, janë liruar nga akuzat për veprat penale: “Keqpërdorim i së drejtës së votimit” dhe “Vjedhje e identitetit dhe pajisje e qasjes”.
Kryetari i trupit gjykues, Musa Konxheli, tha se nuk ka pasur prova që dy të akuzuarit të shpallen fajtorë.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Nuk është provuar se të akuzuarit në bashkëkryerje kanë kryer veprën penale ‘keqpërdorim i të drejtës së votimit’”, tha Konxheli.
Gashi dhe Balaj akuzohen për keqpërdorimin e 71 votave të diasporës.
Sipas prokurorisë, nga kjo vjedhje votash pos të akuzuarit kishin përfituar edhe deputetët e tanishëm, Avdullah Hoti e Kujtim Shala.
Avokati i Sylë Balajt dhe anëtari i Kryesisë së LDK-së, Xhafer Tahiri, deklaroi se aktakuza kishte motive politike, në të cilën kishin kontribuar edhe figura të Vetëvendosjes.
“Duhet të them që kjo ishte një aktakuzë, që nga fillimi e ngritur për motive të pastra politike dhe pa fakte. Prandaj jam i lumtur që Gjykata ka ndarë drejtësinë në këtë rast ku edhe u përfolën figura e emra që as nuk ishin pjesë e këtij procesi penal, e ku ishin të involvuar si dëshmitarë eksponentët më të lartë të partisë në pushtet”, u shpreh Tahiri.
E, avokati i Gashit, Fatmir Kurmehaj, aktgjykimin e të enjtes e quajti fitore të demokracisë.
“Epilogu i sotshëm ka qenë për ne i pritshëm sepse në mungesë të provave dhe fakteve epilogu nuk ka mundur të jetë ndryshe. Prandaj ne besojmë që Gjykata sot e ka dhënë një verdikt me të cilin e ka mbrojtur demokracinë në Republikën e Kosovës”, tha avokati Kurmehaj.
Në këtë rast fillimisht ishin tetë të akuzuar, por pesë prej tyre e pranuan fajësinë, kurse njërit i është veçuar procedura.
Në aktakuzë thuhet se të pandehurit i kanë siguruar kopjet e letërnjoftimit të 71 bashkatdhetarëve në Austri, ku pa pëlqimin e tyre aplikuan në Komisionin Qendror Zgjedhor, duke i shkarkuar fletëvotimet dhe duke i plotësuar ato. Më pas, sipas aktakuzës, fletëvotimet i kanë nisur për në Austri, që ato të kthehen sërish në Kosovë si vota të diasporës.