Pas rasteve të së shtunës, Peja e Rahoveci vazhdojnë testimet e kontakteve

Në 17 ka shkuar numri i të infektuarve me COVID-19 në Rahovec. Dy infermieret, të cilat punonin në repartin e hemodializës në spitalin e Prizrenit, e të cilat dolën pozitive ditë më parë, i kanë infektuar edhe familjarët e tyre.

14 rastet e konfirmuara vetëm të shtunën, janë raste kontakti, në mesin e tyre edhe një fëmijë rreth 3 muajsh. E njëra nga të infektuarat ka punuar në njërën nga bankat në këtë komunë, raporton KOHA.

Sipas drejtorit të QKMF-së, këtu gjendja e të gjithëve është stabile dhe se shumica nuk kanë asnjë simptomë.

Kryetari i Komunës, duke apeluar te qytetarët që të mos grumbullohen, thotë se kanë ndërmarrë të gjitha masat dhe se janë duke i gjurmuar kontaktet.

Ai shtoi se nuk ka marrë ende ndonjë vendim nga Ministria e Shëndetësisë për të hyrë kjo komunë në karantinë. E gjatë së dielës, në këtë qytet janë parë lëvizje të shpeshta të veturave e qytetarëve.

Një tjetër komunë e në të cilën janë shtuar rastet me COVID-19 ditëve të fundit, shkaku i tubimeve mortore, është ajo e Pejës. Kjo komunë që nga e shtuna ka hyrë në karantinë, si zonë e përhapjes së koronavirusit. Drejtori i Shëndetësisë në këtë komunë ka thënë se deri tani janë dërguar për testim edhe rreth 40 mostra të personave të kontaktit.

Deri tani në Pejë, numri i të infektuarve me koronavirus ka shkuar në mbi 45.