Pas më shumë se një viti, në QKUK nis të kryhet analiza për fibrozë cistike

Në Klinikën e Pediatrisë në QKUK javën që shkoi ka rifilluar të bëhet analiza e klorit në djersë, e cila ndihmon në diagnostikimin e sëmundjes së fibrozës cistike. Kjo analizë nuk është kryer për më shumë se një vit si pasojë e mungesës së materialit. Prindër të fëmijëve që u është dashur ta bëjnë analizën për fibrozë cistike tregojnë se në laboratorët privatë kanë paguar për të deri në 150 euro

Nga java e shkuar QKUK-ja ka rifilluar ta kryejë analizën që vërteton apo hedh poshtë dyshimet për praninë e sëmundjes së fibrozës cistike te fëmijët.

Në Klinikën e Pediatrisë thanë se tashmë janë furnizuar me materialin për ta kryer këtë analizë, e që mungoi prej më shumë se një viti.

Pediatrja dhe pulmologia Drita Telaku-Qosaj ka thënë se kjo analizë ndihmon në përcaktimin e diagnozës.

“Analiza e klorit në djersë nuk është. Nuk ishte kryer mbi 1 vit. Arsyeja ishte mungesa e reagensit. Jemi furnizuar dhe tani fillon kryerja e analizës. Pas dyshimit klinik, analiza e klorit në djersë na ndihmon shumë në vendosjen e diagnozës”, ka thënë Telaku-Qosaj.

Fibroza cistike është sëmundje gjenetike, që karakterizohet nga bllokimi dhe infeksioni i rrugëve të frymëmarrjes, nga mangësi në tretje dhe nga pasoja të tjera.

Doktoresha Drita Telaku tregon se gjatë kohës sa nuk ka pasur material për ta kryer analizën që identifikon këtë sëmundje, ajo është bërë vetëm në një laborator privat.

“E kemi pasur shumë problem, sepse nuk kemi pasur se ku t’i dërgojmë fëmijët. Është një laborator privat që e punon këtë analizë dhe kuptohet kush ka mundur ta bëjë privat e ka bërë e kush jo, ka pritur, sepse çdoherë kishim të dhëna që do të vijë materiali së shpejti dhe ne i mbanim pacientët: të presim edhe pak, të presim edhe pak. Mirëpo nuk ka pasur zgjidhje tjetër këtu në Kosovë, përveç laboratorit privat”, ka thënë ajo.

E, prindër të fëmijëve që u është dashur ta bëjnë analizën për fibrozë cistike tregojnë se në laboratorin privat kanë paguar për të deri në 150 euro. Ndërkaq në laborator nuk treguan për çmimin dhe as për numrin e analizave të tilla që kanë kryer gjatë 2022-s.

Atdhe Rama, nënkryetar i Shoqatës për Personat me Fibrozë Cistike, thotë se përveç me analizën, problem tjetër me të cilin përballen familjet e të diagnostikuarve me sëmundjen është edhe moskryerja e testit gjenetik.

“Atëherë nëse duam me ditë se cilin lloj të mutacionit e ka personi, atëherë duhet të bëjë gjithsesi edhe testin gjenetik, i cili për momentin nuk kryhet në vendin tonë, mirëpo për fat të mirë kanë filluar që të merren mostrat në vendin tonë dhe të dërgohen jashtë shteti”, ka deklaruar Rama.

Janë 122 fëmijë të regjistruar në Kliniken e Pediatrisë më fibrozë cistike. Në Klinikë thonë të jenë mirë të furnizuar me barnat për trajtimin e sëmundjes, përveç disa vitaminave dhe disa antibiotikëve specifikë.

Vitin e kaluar prindërit protestuan disa herë para Ministrisë së Shëndetësisë, të cilët kërkuan sigurimin e përhershëm të terapisë për fëmijët e tyre, që ka kosto mujore së paku 1 mijë e 500 euro.