Pas 32 vjetësh, Engel largohet nga institucioni ku e ngriti çështjen e Kosovës

Një nga zërat më kumbues i cili prej dekadash avokon për Kosovën më nuk do të jetë pjesë e Kongresit Amerikan. Pas 32 vjetësh, Eliot Engel largohet prej institucionit ku shpesh e ngriti edhe çështjen e Kosovës. Ai pati peshë të rëndësishme në denoncimin e shkeljes së të drejtave të shqiptarëve nga Serbia i cili do të kulmonte me gjenocid në fund të viteve 90-ta.

Në periudhën kur Jugosllavia po shpartallohej dhunshëm, Engel u bë anëtar i Kongresit. Ai ishte ndër ligjvënësit e parë amerikanë që i bëri thirrje administratës së presidentit Clinton të ndërhyjë ushtarakisht në Kosovë për t’i dhënë fund represionit të Millosheviqit.

Angazhimin nuk e ndali as pas përfundimit të luftës, duke lobuar për pavarësinë dhe forcimin e shtetit të Kosovës. Në fjalimin lamtumirës, Engel e ka përmendur edhe Kosovën, duke thënë se zë një vend të veçantë në zemrën e tij.

“Unë gjithmonë kam pasur një vend të veçantë në zemrën time për Ballkanin dhe në veçanti për Kosovën. Në vitin 1999, fuqishëm e kam përkrahur intervenimin e Administratës Clinton në Ballkan. Ne e dimë se parandaluam gjenocidin. Që nga atëherë, kam qenë përkrahës i sovranitetit të Kosovës dhe pavarësisë. Shteti ka bërë hapa të jashtëzakonshëm dhe njihet nga SHBA-ja, Mbretëria e Bashkuar, Franca, Gjermania, Japonia dhe shumë shtete të tjera të rëndësishme”, ka thënë Engel.

Engel iu kundërvu edhe administratës Trump, duke i parë me shqetësim siç i quante ai taktikat e duarve të rënda që presidenti amerikan përdori në raport me Kosovën.

Në kulmin e fushatës në ShBA, Engel ia kujtoi Trumpit se luftën në Kosovë e përfundoi Bill Clintoni dhe NATO, e jo siç pretendonte ish-presidenti republikan. Trump e prezantoi si trofe diplomatik marrëveshjen ekonomike të 4 shtatorit mes Kosovës dhe Serbisë, e cila u nënshkrua në Shtëpinë e Bardhë. Sipas Trumpit, ai ndali luftën 400-vjeçare mes të dyja vendeve, teksa përshkruante momentin kur liderët e të dyja vendeve ishin përqafuar në zyrën e tij.

73-vjeçari Engel nuk e ka në plan të pensionohet pas humbjes së befasishme në zgjedhjet e mbajtura verën e kaluar. Edhe pse nuk ka zbuluar detaje për angazhimet e ardhshme, nuk kishte hezituar ta shpalosë pasionin e tij për cepin e vogël të Evropës- Ballkanin. Këtë e përmendi në seancën dëgjimore në Kongres, më 8 dhjetor, e cila u thirr me synimin që administratës së re amerikane t’i rekomandohet ndryshimi i qasjes në Ballkan.

Prej aty Engel kërkoi drejtësi për viktimat e luftës së fundit në Kosovë si dhe tre shqiptaro-amerikanët që janë ekzekutuar nga policia serbe në vitin 1999. Vrasësit e vëllezërve Bytyqi ende nuk janë zbuluar.

Ai e ka quajtur të padrejtë që Kosovës t’i kërkohet gjykimi i krimeve të luftës në Dhomat e Specializuara, e Serbia të amnistohet.