-
Nga:
Dorentina Thaqi
- 17 shkurt 2021 12:46
- Shpërndaje në:
Një gjurmë në shenjë respekti për Ushtrinë Çlirimtare të Kosovës është mesazhi i “NEWBORN”-it për këtë vit.
Sikur edhe në çdo vit tjetër në prag të festës së Pavarësisë së Kosovës, monumenti merr pamje të re.
Shtatë shkronjat e monumentit që simbolizon Pavarësinë e Kosovës vazhdojnë të mbesin atraksion për qytetarët në çdo përvjetor.
Përmes artit, tash e sa vjet “NEWBORN”-i bart mesazhe të ndryshme, falënderime e protesta.
Sipas ideatorit Fisnik Ismaili, domethënia për nder të 13-vjetorit të shpalljes së Pavarësisë është menduar si kundërshtim i imazhit negativ të UÇK-së në skenën ndërkombëtare.
“Secili mesazh e ka treguar Kosovën si pjesë të botës. Mesazhet kanë tematikë politike, por jo të agjendave të subjekteve brenda, slogane të njërës apo parti tjetër. NEWBORN-i gjithmonë ka qenë gjithëpërfshirës dhe si i tillë e ka trajtuar një temë të caktuar”, ka thënë ai.
Monumenti, ani pse ka ndryshuar pamje disa herë, vetëm tri herë u është mundësuar qytetarëve që të lënë shenjat e tyre.
Për herë të parë u ishte lejuar në vitin 2008, më 17 Shkurt, kur u bë inaugurimi i obeliskut që menjëherë ishte shndërruar në brend.
Edhe në shkurt të vitit 2015 ishin ftuar qytetarët që ta ngjyrosnin si të donin. Asokohe, ndër të tjera, E-ja u bë e zezë, e këtë autori e kishte lidhur me eksodin, Evropën, ekonominë e EULEX-in.
Hera e tretë ishte në vitin 2019, kur ngjyrosja u ishte lënë plotësisht në dorë të rinjve sipas dëshirës së tyre, si mesazh për lirinë e shprehjes.
Edhe këtë vit qytetarët janë të lirë të lënë shenjat e tyre, ani pse duhet ndjekur konceptin e menduar. Por kjo nuk është diçka e rastësishme, pasi që ngjyrat simbolizojnë rrobat e UÇK-së.
Qytetarët e mirëpresin këtë ndryshim, duke thënë se kjo përçon mesazh për Ushtrinë e pastër që kishte Kosova.
Ideatori i këtij monumenti tregon se cilin nga mesazhet e ka më për zemër.
“NEWBORN”-i disa herë ishte në vëmendje të mediave ndërkombëtare. Por që promovimi më i mirë iu bë përmes këngëtares Rita Ora, e cila mbi të realizoi disa pjesë të vidoklipit të një kënge të lansuar gjatë vitit 2012.
Vitin e kaluar ngjyrosja e “NEWBORN”-it ishte një homazh për viktimat e abuzimit seksual gjatë konflikteve anembanë botës.
Monumenti që simbolizonte lindjen e një shteti të ri u vendos në qendër të Prishtinës më 17 Shkurt 2008, në ditën e shpalljes së Pavarësisë së Kosovës.