Në mungesë të fondeve, “Handikos” mund të mbyllet nga 15 janari

Nga 15 janari, shoqata “Handikos” nuk ka më asnjë projekt të mbështetur financiarisht, për të ofruar shërbime për personat me aftësi të kufizuara. Prindër të fëmijëve në karrocë thanë se mbyllja eventuale do t’ua rriste ekstremisht koston e shërbimeve, që ofrohen në institucione private.

Përfaqësues të shoqatës “HANDIKOS” në Prishtinë alarmuan të shtunën se nga gjysma e janarit u përfundojnë të gjitha projektet e financuara, për të ofruar shërbimeve sociale për personat në karrocë.

Në një konferencë shtypi, drejtori i “HANDIKOSIT”, Afrim Maliqi, tha se përkrahja e siguruar nga komuna, ka mjaftuar vetëm për gjashtë muaj.

“Ato projekte po përfundojnë dhe fatkeqësisht, tani po përfundojnë të gjitha projektet që kanë të bëjnë me shërbime. Personat me aftësi të kufizuara duhet t’i drejtohen Komunës së Prishtinës, për shkak se komuna është institucion i parë, i cili është obliguar që të përmbush nevojat e qytetarëve, për shkak se ajo nevojë është e drejtë, dhe jo vetëm nevojë, meqenëse nga 15 janari asnjë projekt ne nuk e kemi për ofrimin e shërbimeve si për fëmijë, si për të rritur”, ka thënë ai.

E Fidajete Pllana, e cila është pjesë e grupit avokues për persona me aftësi të kufizuara, tha se kjo situatë do t’i dëmtojë personat paraplegjikë e tetraplegjikë, ekonomikisht e edhe emocionalisht.

“Ne mjaft kemi sfida dhe barriera për të arritur deri te një shërbim, qoftë shëndetësor apo social, e tani të ballafaqohemi edhe me ndërprerjen e tyre. Është shumë e padrejtë dhe për keqardhje. Realisht jemi të rënduar emocionalisht dhe të dëmtuar ekonomikisht sepse me ndërprerjen e këtyre shërbimeve, i gjithë progresi i arritur deri më tash, do të kthehet në regres për fëmijët e të rriturit me aftësi të kufizuara, por edhe për neve prindërve”, ka thënë Pllana. “Në vend që personat me aftësi të kufizuara t’u gëzohen festave të fundvitit si çdo qytetar tjetër, në fakt duhet të preokupohemi se a do të marrim shërbime nga janari apo jo, e më së paku këto grupe të qytetarëve duhet të dinë për këtë problematikë”.

Ismail Krasniqi e ka vajzën me aftësi të kufizuara. Ai tha se sigurimi i shërbimeve jashtë “HANDIKOS”-it, ka kosto të lartë.

“Neve nuk na intereson se kush financon apo nga vijnë këto mjete. Mua më intereson ta sjell vajzën këtu se është puna se nuk mundet asnjë prind t’ia dalë, se ka një kosto shumë të madhe, kanë sëmundje të ndryshme. Fëmijët janë duke marrë shërbime ditore. Ne tjetër kund nuk kemi ku të shkojmë ose duhet me shku çdo ditë me i dhanë 15 euro, 20 euro veç fizioterapi, ose te psikologu. Kush ka qenë e di sa kushton”, ka thënë Krasniqi.

Aktivistë të grupit avokues për personat paraplegjikë dhe tetraplegjikë paralajmëruan edhe protesta, në rast se nuk i bëhet zgjidhje.