Ndryshimi i Ligjit për veteranët nuk përfshihet në programin legjislativ të Qeverisë

Heqja e kufizimit të punësimit për veteranët ishte proklamuar si prioritet në mandatin e ri, por ndryshimi i ligjit nuk është përfshirë në agjendën legjislative. Programi legjislativ 2026-2028 parashikon 174 projektligje, nga të cilat këtë vit Qeveria synon t’i procedojë 143 për miratim në Kuvend

Ndryshimi i ligjit që mundëson heqjen e kufizimit të punësimit për veteranët e luftës së UÇK-së nuk është përfshirë në agjendën legjislative të Qeverisë, ani se ishte premtuar se do të jetë në mesin e pesë vendimeve të para të qeverisë “Kurti 3”.

Megjithatë, programi legjislativ që përfshin periudhën 2026-2028 i ka të planifikuara për miratim 174 projektligje. Nga to, vetëm këtë vit, ekzekutivi synon t’ia procedojë Kuvendit për miratim 143 sosh.
Në pjesën e parë të vitit, Qeveria ka në plan t’i procedojë disa nga projektligjet që nuk arriti t’i kthejë ligje as për gati 5 vjet mandat.

Deri në fund të marsit, planifikon ta dërgojë në Kuvend për miratim Projektligjin për Byronë Shtetërore për Konfiskimin e Pasurisë së Pajustifikueshme e deri në fund të prillit edhe atë për çmimet tavan.
Brenda kësaj periudhe kohore, pos Byrosë, Ministria e Drejtësisë do ta sponsorizojë edhe Projekt Kodin Civil, Ministria e Punëve të Brendshme Projektligjin për Gjendjen Civile e ajo e Shëndetësisë Projektligjin për Shëndet Riprodhues dhe Fertilizim të Asistuar Mjekësor, për të cilët nuk pati vota të mjaftueshme në legjislaturën e tetë edhe pse koalicioni qeveritar numëronte mbi 61 deputetë.
Në programin legjislativ të Qeverisë parashihet që deri më 31 tetor, Ministria e Digjitalizimit dhe Administratës Publike t’ia dorëzojë Kuvendit Projektligjin për Pagat në Sektorin Publik.

Edhe në këtë mandat, Ministria e Financave e ka në plan themelimin e Bankës Zhvillimore, por ky projektligj më së largu do t’i dorëzohet Kuvendit në mes të 2027-s.

Nga 12 ligjet që në janar i rrëzoi Gjykata Kushtetuese për shkak të paligjshmërisë në ndjekjen e procedurave për miratimin e tyre, katër nuk janë fare në agjendë legjislative.

Të tjerat janë të planifikuara tek pas mesit të këtij viti, përfshirë edhe Ligjin për lojërat Mesdhetare, ndonëse në Qeveri ishin ankuar për vonesë nga Gjykata në trajtimin e tij.

Përgjegjësinë për përgatitjen e numrit më të lartë të projektligjeve e ka Ministria e Financave - 29 sosh e pasuar nga ajo e Industrisë, Ndërmarrësisë dhe Tregtisë me 19.