Ndërpritet angazhimi i 45 punëtorëve shëndetësorë në Gjilan, Komuna s’ka buxhet

Kontrata mes Komunës dhe kompanisë “Kosovamed”, me të cilën në QKMF ishin të angazhuar punonjësit shëndetësorë, është mbyllur para kohe pasi është shpenzuar buxheti i paraparë. Nga Drejtoria e Shëndetësisë në Gjilan kanë thënë se kanë ende nevojë për këta punonjës dhe se mungesa e tyre do të ndikojë në ofrimin e shërbimeve

45 punëtorë shëndetësorë në Qendrën Kryesore të Mjekësisë Familjare në Gjilan, të angazhuar përmes tenderit të Komunës, ku fitues ishte kompania “Kosovamed”, kanë mbetur pa punë nga e hëna (23 nëntor).

Komuna e Gjilanit pati nënshkruar kontratë me kompaninë “Kosovamed” në shtator të vitit të kaluar, e cila parashihej të ishte valide për dy vjet.

Megjithëse tenderi ishte i hapur për vetëm 28 punëtorë, Komuna pati angazhuar 45, duke e tejkaluar numrin e paraparë me kontratë.

Nga kompania ‘Kosovamed” kanë deklaruar se për shkak të numrit më të madh të punëtorëve të angazhuar, buxheti i kontratës është shpenzuar brenda 14 muajve, duke bërë që angazhimet e punëtorëve të mos mund të vazhdojnë më tej.

“Kontrata ka arritur pothuajse kulmin, pra tavanin e saj buxhetor, dhe për këtë arsye ka përfunduar. Është shteruar buxheti i kontratës. Nëse Komuna dëshiron, mund të shpallë edhe një projekt tjetër”, thuhet në përgjigjen e “KosovaMed”.

Vlera totale e kontratës ishte 449.683 euro, mjete të planifikuara për periudhë dyvjeçare.

Albulena Hasani, e cila ka qenë e angazhuar në QKMF-në e Gjilanit, thotë se janë informuar se kontrata do të përfundonte në rast të mungesës së buxhetit.

“Në kontratë na shkruan se në rast se komuna nuk ka buxhet, kontrata përfundon. Këtë e kemi ditur. Tash komuna s’ka buxhet dhe kontrata ka përfunduar. Kemi shërbyer në ambulanca, patronazh dhe me pacientë. Shpresojmë që së shpejti të bëhet diçka e re, të hapen konkurse të reja dhe të jemi sërish në rrjedhë të punës”, ka thënë ajo.

Drejtori i Shëndetësisë në Komunën e Gjilanit, Hekuran Rapuca, është shprehur se mungesa e këtyre punëtorëve do të ndikojë ndjeshëm në shërbime, pasi nevoja për ta është e madhe.

Sipas tij, për shkak se buxheti i vitit 2025 ende nuk është miratuar, Komuna nuk ka mundur të hapë procedura të reja të prokurimit.

“Kemi shtuar shumë shërbime shëndetësore dhe na nevojitet shumë stafi që e kemi pasur me ‘Kosovamed’. Besoj se shpejt do të gjejmë një zgjidhje. Jemi duke përgatitur procedurat ligjore se si të nisim një aktivitet të ri, në mënyrë që të paktën nga fillimi i vitit 2026 të vazhdojmë me blerje të reja të shërbimeve”, ka thënë Rapuca.

Për këtë situatë kanë reaguar edhe nga opozita në Gjilan.

“I bëjmë thirrje Komunës së Gjilanit të marrë përgjegjësi, të vazhdojë menjëherë kontratat e mantelbardhëve dhe të sigurojë pagat për mbi 300 punëtorët e tregut. Komuna duhet të gjejë rrugën ligjore që këta profesionistë të vazhdojnë punën dhe qytetarët të mos mbesin pa shërbime. Mirëqenia e qytetarëve nuk mund të lihet në dorë të vendimeve arbitrare”, ka thënë Arbër Ismajli, kryetar i degës së LDK-së në Gjilan.

KOHA pati raportuar në gusht të këtij viti se ky grup i punonjësve shëndetësorë, i angazhuar përmes kontratës me “Kosovamedin”, nuk i pati marrë me kohë pagat për muajt qershor dhe korrik, për shkak të problemeve buxhetore që vazhdon të ketë Komuna e Gjilanit.