Analisti politik, Artan Muhaxheri, ka deklaruar se qeveria e ardhshme që do të formohet rrezikon të jetë jetëshkurtër dhe jostabile, pasi sipas tij, rezultatet e tanishme të zgjedhjeve parlamentare s’kanë përcaktuar fituesin.
Ai ka thënë të hënën në “60 Minuta” të KTV-së, se rezultati ka komplikuar situatën, pasi sipas tij, të dy palët mund të krijojnë qeverinë.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Ky rezultat i komplikon gjërat në maksimum. Realisht të dy palët mund të formojnë Qeverinë. Vetëvendosje me pakicat e edhe partitë opozitare me pakicat. Kjo duhet të jetë rezultat që përfshin gatishmëri për kompromise, negociata dhe cila palë do të jetë më e aftë të bëjë kompromise që ta bëjë Qeverinë. Por tash janë elementë specifik. Lista Serbe do të jetë problemi kryesor nëse VV-ja tenton të bëjë qeverinë e vetme. Partitë e kanë përjashtuar mundësinë që të bëjnë koalicion me VV-në dhe kanë vija të kuqe”, ka thënë Muhaxheri.
Ai është shprehur se secila parti që synon të bëjë Qeverinë me VV-në, do të humbasë imazh pasi “Albin Kurti do të jetë dominues”.
“...Kthesa për të bashkëpunuar do të jetë e pamoralshme dhe do t’ia shihnin sherrin për zgjedhjet e tjera. Ekziston mundësia që partitë opozitare të bëjnë qeverinë vet nga presioni amerikan dhe i Bashkimit Evropian e nga obligimet që e presin Kosovën. Një Qeveri e tillë do të ishte jostabile, ishullore dhe e pasigurt pasi askush s’do të ketë mundësinë të ndikojë te dikasteret dhe do të ishte afatshkurtër”, është shprehur ai.
Sipas analistit politik, votat e diasporës, Lista Serbe dhe çështja e presidentit që duhet të zgjidhet në vitin e ardhshëm do të mund të ndryshojnë situatën e ekzekutivit të ardhshëm.
“Do të kemi një jostabilitet pasi këto katër vjet ka pasur një stabilitet për dallimin e madh të votave. Nëse VV-ja mbetet në opozitë, do të ishte pakrahasimisht më ë fuqishme, por për fat të keq do të përsëritej një VLAN 2.0, do të fillonin takimet mes liderëve të opozitës për ndarje të pushtetit. Por një gjë është e sigurt se gjithçka është në rrezik”, është shprehur Muhaxheri.
Sipas analistit, edhe çështja e administratës Trump do të ketë efekt në qeverisjen e ardhshme pasi tha se “është brutale në marrjen e vendimeve”.
“Për Kosovën kjo është tablo e zymtë për të ardhmen e afërt në Kosovë”, ka thënë ai.