Manaj: Kuvendi i jashtëzakonshëm i LDK-së do të mbahet para 7 gushtit

Anëtari i Kryesisë së Lidhjes Demokratike të Kosovës (LDK), Shkëmb Manaj, ka thënë se synojnë që ta organizojnë Kuvendin e jashtëzakonshëm të partisë para 7 gushtit - në ditën kur përfundon afati për thirrjen e seancës konstituive. 

Këto deklarata Manaj i bëri pas përfundimit të mbledhjes së Kryesisë së LDK-së të enjten, një ditë pasi u dorëzuan nënshkrimet për thirrjen e Kuvendit për shkarkimin e kryetarit Lumir Abdixhiku.

Për shkak të kësaj nisme, Abdixhiku njoftoi dje se ka pezulluar negociatat me Lëvizjen Vetëvendosje. KOHA ka raportuar po dje që në takimin e së premtes Abdixhiku - Albin Kurti është arritur pajtim në parim për bashkëqeverisje.  

Manaj gjatë deklarimit të sotëm megjithatë ka mohuar, duke thënë se nuk ka pasur marrëveshje. 

“Nuk ka pasur marrëveshje dhe nuk ka qenë ajo marrëveshje që është prezantuar”, ka thënë ai.