Kryeministri i Kosovës, Albin Kurti, ka kërkuar që Serbia të dorëzojë vrasësit e aktivistit Enver Hadri pas konfirmimit të dënimit të tyre nga Gjykata Penale në Bruksel të martën (dje).
Gjykata Penale në Bruksel dje konfirmoi burgimin e përjetshëm për Veselin Vukotiqin dhe Andrija Drashkoviqin, të cilët bashkë me Bozhidar Spasiqin, ishin dënuar në vitin 2016 me burgim të përjetshëm për vrasjen e Enver Hadrit në vitin 1990 në Bruksel.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoPavarësisht konfirmimit të fajësisë, të dënuarit nuk janë dorëzuar për t’u paraqitur para drejtësisë belge, pasi autoritetet serbe kanë refuzuar të bashkëpunojnë.
Për konfirmimin e dënimit të vrasësve të Hadrit, Kurti theksoi se ky është triumf i drejtësisë, por kërkoi që ky proces të kompletohet me dorëzimin e autorëve nga Serbia.
“Ky konfirmim i sistemit të drejtësisë së Belgjikës për dënimet paraprake me burgim të përjetshëm për vrasësit e Enver Hadrit, është një triumf i drejtësisë që për t’u kompletuar, do të duhej të pasohej nga bashkëpunimi i autoriteteve të Serbisë duke i dorëzuar këta tre vrasës te autoritetet e Belgjikës”, ka shkruar Kurti ndër të tjera.
Enver Hadri, i njohur për angazhimin e tij në mbrojtjen e të drejtave të shqiptarëve dhe për përpjekjet për ndërkombëtarizimin e çështjes së Kosovës, u vra më 25 shkurt 1990 në Bruksel. Ky akt i shërbimeve sekrete serbe ka qenë një nga ngjarjet më tragjike të periudhës, duke lënë pas trashëgimi të rëndësishme në historinë e Kosovës.
Në fillim të këtij viti, Qeveria e Kosovës pati ndarë 100 mijë euro për mbështetje juridike dhe financiare të procesit gjyqësor për familjarët e Hadrit.