-
Nga:
Marigona Brahimi
- 30 prill 2025 17:40
- Shpërndaje në:
Kryetari i Lëvizjes Vetëvendosje, njëherësh kryeministër në detyrë, Albin Kurti, i ka ftuar në takim kryetarin e Partisë Demokratike të Kosovës (PDK), Memli Krasniqi dhe atë të Lidhjes Demokratike të Kosovës (LDK), Lumir Abdixhiku.
Takimi është ftuar për të enjten në orën 8:30, para kohës kur është caktuar të mbahet vazhdimi i nënë i seancës konstituive.
"Duke u bazuar ne Kushtetutë, tre nënkryetarë do të jenë nga tri partitë që fituan më së shumti ulëse, andaj ju ftoj për një takim të përbashkët edhe me z. Lumir Abdixhiku, kryetarin e LDK-së, në sallën N-204 te Kuvendit të Republikës se Kosovës, nesër (e enjte), 1 maj 2025, në orën 8:30”, ka shkruar Kurti në ftesën drejtuar Krasniqit.
Të martën deputetët i thanë për të gjashtën herë jo kandidaturës së Albulena Haxhiut të LVV-së për kryetare të Kuvendit.
Kësisoj seanca konstituive e nisur më 15 prill dështoi edhe për herën e tetë radhazi.
Lëvizja Vetëvendosje, ani se nuk i ka 61 votat e nevojshme të deputetëve për ta zgjedhur Haxhiun, sërish nuk lëvizi nga rikandidimi i saj.
Krasniqi thotë se do t’i shkojë Kurtit në takim: E inkurajoj që të reflektojë
Photo: Driton Paçarada
Kryetari i Partisë Demokratike të Kosovës (PDK), Memli Krasniqi, ka njoftuar se do të shkojë në takimin e thirrur nga kreu i Lëvizjes Vetëvendosje, Albin Kurti, për konsultime për konstitutim të Kuvendit.
“Duke besuar thellësisht se Republika e Kosovës ka nevojë urgjente për zhbllokim institucional dhe për rikthimin e funksionimit të rregullt të institucionit më të lartë legjislativ, si dhe për t’i hapur rrugë afateve kushtetuese për themelimin e Qeverisë, do t'i përgjigjem pozitivisht kësaj ftese për takim”, ka shkruar Krasniqi në Facebook, për takimin që Kurti e ka ftuar në orën 8:30 të enjten.
Ai ka thënë se e inkurajon Kurtin që të reflektojë mbi situatën e krijuar që të të gjej një kandidat siç ka thënë, të përshtatshëm për kryetar të Kuvendit.
“Në këtë frymë, e inkurajoj z. Kurti që të reflektojë me përgjegjësi mbi situatën aktuale dhe të shfaqë vullnet të sinqertë për të mundësuar formimin e institucioneve të reja, në mënyrë që Kosova të ketë sa më parë një Kuvend dhe një Qeveri legjitime e funksionale. Në këtë kontekst, gjetja e një kandidateje apo kandidati të përshtatshëm, që gëzon mbështetjen e shumicës së deputetëve, do të ishte një hap i rëndësishëm përpara”, ka shkruar kreu i PDK-së.
Tutja ai ka shkuar se për çështjen e nënkryetarëve të Kuvendit nuk ka asgjë për të diskutuar, pasi kjo sipas tij, është një e drejtë e garantuar nga Kushtetuta dhe e përcaktuar qartë.
“Partia Demokratike e Kosovës, sikur gjithmonë, do të vazhdojë të sillet me përgjegjësi dhe seriozitet institucional, në përputhje me interesin shtetëror dhe qytetar. Të gjitha qëndrimet e detajuara të PDK-së do t’i bëjmë publike edhe nesër, gjatë dhe pas takimit, përmes një konference për media”, ka shkruar Krasniqi.
Bajrami: Askush nga LDK-ja s’do të shkojë në takimin e thirrur nga Kurti
Photo: Driton Paçarada
Shefja e deputetëve të LDK-së Hykmete Bajrami, ka thënë se as kryetrari i LDK-së, Lumir Abdixhiku, e as dikush tjeter nga LDK-ja nuk do të marrë pjesë në takimin e thirrur nga kreu i Lëvizjes Vetëvendosje, Albin Kurti.
“Megjithatë, as kryetari Abdixhiku dhe askush nga Lidhja Demokratike e Kosovës nuk do të merr pjesë në këtë takim. Pozita e nënkryetarit të Kuvendit që i takon Lidhjes Demokratike të Kosovës është në bazë të rezultatit zgjedhor, dhe nuk është objekt diskutimi me asnjë parti tjetër. Për me tepër nënkryetarët votohen në pako nga Kuvendi, sipas praktikës së deritanishme”, ka thënë Bajrami për KOHËN.
“Ndërsa zgjedhja e kryetarit të Kuvendit është çështje e marrëveshjes politike mes partive që synojnë të krijojnë shumicën dhe Lidhja Demokratike e Kosovës tashmë e ka bërë të qartë se nuk është e interesuar për një marrëveshje të tillë”, ka shtuar Bajrami.
