-
Nga:
Donisa Fazliu
- 28 tetor 2025 16:31
- Shpërndaje në:
Ministri në detyrë i Brendshëm, Xhelal Sveçla, ministri në detyrë i Administrimit të Pushtetit Lokal, Elbert Krasniqi e kryetari në largim i Mitrovicës së Veriut, Erden Atiq, të martën kanë inauguruar një shkollë fillore në lagjen “Kodra e Minatorëve”. Pjesëmarrës ishte edhe kandidati i Lëvizjes Vetëvendosje për Mitrovicën e Jugut, Faton Peci.
Atiq e mori fjalën i pari, duke thënë se kjo është shkolla e dytë që po ndërtojnë në këtë komunë, pas asaj në lagjen e Boshnjakëve më 3 tetor.
“Gjendemi këtu në lagjen Kodra e Minatorëve, në inaugurimin e shkollës fillore. Një projekt i Qeverisë Kurti dhe Ministrisë së Arsimit. Sapo e përfunduam inaugurimin e projektit të shkollës fillore. Kjo është shkolla e dytë, pas asaj në lagjen e Boshnjakëve, në inaugurimin që e bëmë më 3 tetor. Ky projekt pritet të përfundojë brenda 15 muajve. Shkollë me kapacitet prej 350 nxënësish. Faleminderit Qeverisë dhe Ministrisë”, ka thënë ai.
E përfaqësuesi i Ministrisë së Arsimit, Muhedin Nushi, ka treguar se kostoja e këtij projekti është 2.3 milionë euro.
“Në mungesë të ministres Nagavci, sot unë jam përfaqësues i Ministrisë së Arsimit. Kostoja e këtij projekti është 2.3 milionë euro. Edhe kryetari e theksoi se është objekti i tretë infrastrukturor në komunën e Mitrovicës së Veriut, pas shkollës dhe çerdhes në lagjen e Boshnjakëve. Sot e inauguruam edhe këtë objekt dhe do të vazhdojmë me investime të tjera. Dua t’ju kujtoj se Ministria e Arsimit, gjatë këtij mandati, ka investuar vetëm në infrastrukturë arsimore gjithsej 162 milionë euro, nga të cilat 73 milionë vetëm për shkolla – ndërtim të ri të shkollave, riparim dhe rindërtim të tyre. Kështu që investime të tilla janë ndër më të dobishmet”, u shpreh Nushi.
“Rinia jonë jo vetëm të ketë kushte për mësim, por të ketë edhe një perspektivë, në një ambient të sigurt për të gjithë. Unë jam jashtëzakonisht i lumtur që po vazhdojmë me këto lloj projektesh në këtë zonë, e cila deri vonë është njohur si zonë problematike, e tash është kthyer në një zonë prosperuese për të gjithë banorët”, ka deklaruar ai.
VIDEO: