Instituti Kombëtar i Shëndetësisë Publike, ka njoftuar se vlerat e manganit kanë rënë dukshëm në Liqenin e Badocit por megjithatë uji akoma vazhdon të jetë i papijshëm.
“Këto vlera janë dukshëm më të ulëta se standardi shëndetësor prej 0.3 mg/L, i cili konsiderohet prag ku mund të ketë ndikim në shëndetin e njeriut. Megjithatë, rezultatet e analizave laboratorike të ditëve të fundit, me vlerën maksimale prej 0.067 mg/L, ende e tejkalojnë kufirin e përcaktuar me Udhëzimin Administrativ nr. 10/2021 “ Për cilësinë e ujit të destinuar për konsum njerëzor”, ku norma e lejuar për manganin është 0.05 mg/L. Me qëllim të respektimit të legjislacionit në fuqi dhe mbrojtjes së shëndetit të popullatës, IKSHPK vazhdon të rekomandojë se uji në këtë zonë ende nuk është i sigurt për pije.”, thuhet në njoftimin e IKSHPK-së në Facebook.
Tutje bëhet e ditur se do të vazhdojë edhe më tutje monitorimi i ujit atje.