Reagimi i IKD-së vjen pas vendimit të KQZ-së më 27 nëntor, ku u bë e ditur se në mbledhjen e 84-të është miratuar lista e qendrave të votimit jashtë vendit, për zgjedhjet e parakohshme për Kuvendin e Kosovës. Përveç përfaqësive diplomatike, KQZ-ja ka vendosur që qendra votimi të hapen edhe në lokacione shtesë, sipas propozimit të Ministrisë së Punëve të Jashtme dhe Diasporës (MPJD).
Sipas vendimit, 10 qendra të reja votimi do të hapen në Gjermani (5), Zvicër (3), Mbretërinë e Bashkuar (1) dhe SHBA (1), me gjithsej 43 vendvotime dhe kapacitet deri në 40,850 votues.
Por IKD-ja thekson se Ligji nr. 08/L-228 nuk parasheh asnjë mundësi për hapjen e qendrave të votimit jashtë përfaqësive diplomatike.
“Ligji përcakton qartë se qendra votimi jashtë vendit mund të funksionojnë vetëm në ambasada, konsullata dhe misione diplomatike të Republikës së Kosovës, dhe vetëm pasi KQZ të vlerësojë hapësirat fizike të këtyre objekteve në bashkëpunim me MPJ-në”, thuhet në reagim.
IKD-ja potencon se KQZ-ja është e obliguar të kërkojë nga MPJD-ja listën e përfaqësive diplomatike dhe kapacitetet e tyre, ndërsa ministria të ofrojë informatat brenda afateve ligjore.
“Ligji dhe rregulloret zgjedhore nuk lejojnë që MPJD-ja të propozojë hapësira të tjera jashtë këtyre përfaqësive, e as që KQZ-ja të marrë vendim për lokacione alternative”, vijon reagimi.
IKD-ja kujton edhe rregulloren 04/2025, e cila përcakton se në rast se kapacitetet e një përfaqësie diplomatike tejkalohen, aplikuesit duhet të udhëzohen për mënyra të tjera të votimit – dhe jo të hapen qendra të reja jashtë përfaqësive.
Sipas institutit, ky vendim i KQZ-së rrezikon integritetin e procesit zgjedhor dhe mund të hapë mundësi për keqpërdorime, përfshirë edhe mundësinë e anulimit të votave në këto qendra, për shkak se ato nuk bazohen në ligj.
IKD-ja apelon që KQZ-ja të tërhiqet nga vendimet që bien ndesh me ligjin dhe të sigurojë që procesi zgjedhor të zhvillohet në përputhje të plotë me dispozitat ligjore, duke garantuar legjitimitetin dhe besueshmërinë e zgjedhjeve.