Kryetari i Aleancës për Ardhmërinë e Kosovës (AAK), Ramush Haradinaj, ka reaguar pas operacionit të kërkim-shpëtimit të zhvilluar nga Forca e Sigurisë së Kosovës (FSK) në Liqenin e Ujmanit të martën, duke theksuar rëndësinë e koordinimit me aleatët ndërkombëtarë dhe rolin e pazëvendësueshëm të NATO-s në vend.
“Aleanca me NATO-n, në krye me ShBA-në, është qenësore për Kosovën. Vendimet e marra në koordinim me aleatët tanë janë pashmangshëm në favor të shtetit tonë sovran dhe të ardhmes së tij”, ka shkruar Haradinaj në Facebook.
Ai shtoi se “hisedarët e shtetësisë së Kosovës nuk mund të anashkalohen”, duke nënvizuar rëndësinë e përfshirjes së të gjitha institucioneve dhe aleatëve në vendimmarrje të ndjeshme për vendin.
Haradinaj shprehu mirënjohjen e tij për angazhimin e vazhdueshëm të NATO-s dhe trupave të KFOR-it në ngritjen e kapaciteteve të FSK-së dhe shprehu ngushëllimet për familjen e qytetarit që humbi jetën në këtë rast tragjik.
“Shpreh ngushëllimet e mia më të sinqerta familjes së qytetarit që humbi jetën në Liqenin e Ujmanit. Në këtë moment dhimbjeje, jemi pranë familjarëve dhe të afërmve të tij”, përfundoi ai.
Operacioni i FSK-së të martën (dje) për gjetjen e një 33-vjeçari që kishte rënë nga ura në Liqenin e Ujmanit të dielën ka nxitur reagime të shumta. Partitë opozitare kanë kritikuar qeverinë në detyrë se po shfrytëzon rastin tragjik për poena politikë. Ngjashëm reagoi edhe Ambasada e Gjermanisë gjatë ditë së djeshme. Ambasada britanike dhe italiane në reagimet e sotme i kanë dhënë mbështetje KFOR-it, duke e vlerësuar bashkëpunimin me FSK-në.