Gjykata në Beograd ia ka caktuar masën e paraburgimit prej 30 ditësh ish-pjesëtarit të Ushtrisë Çlirimtare të Kosovës, Avni Qenaj, që u arrestua më 25 nëntor.
Serbia e arrestoi Qenajn me pretekstin se ka qenë pjesë e një organizate, që sipas autoriteteve në Beograd, ka qenë terroriste. Sipas Ministrisë serbe për Punë të Brendshme, Qenaj në prill të vitit 1998 i është bashkuar shtabit lokal të UÇK-së për fshatin Romajë në Komunën e Prizrenit dhe se si pjesëtar i brigadës 138 “Agim Ramadani” ka marrë pjesë në Koshare në vitin 1999.
E avokati Xhevdet Smakiqi në një shkrim të shtunën ka bërë të ditur se ndaj Qenajt është caktuar masa e paraburgimit, pa asnjë provë të vetme.
Ai ka akuzuar autoritetet e Kosovës, pasi sipas tij, po ia lehtësojnë Serbisë shkeljet e marrëveshjes së Brukselit.
“Në mungesë të një Qeverie serioze të Kosovës vazhdojnë kidnapimet e ish-pjesëtarëve të UÇK-së, sepse Qeveria duke u sjellë në mënyrën më joserioze që 5 vite në negociatat në Bruksel, Serbia lehtësisht shkel marrëveshjet e Brukselit ku garantohet liria e lëvizjes dhe kapitalit si e drejtë themelore njerëzore dhe parime themelore të BE-së, por që kjo e drejtë nuk po zbatohet për ish-pjesëtarët e UÇK-së”, ka shkruar Smakiqi në Facebook. “Ish-pjesëtarit të UÇK-së, shtetasit të Republikës së Kosovës, Avni Qenaj, pa asnjë provë të vetme Gjykata në Beograd dje ia ka caktuar 30 ditë paraburgim në vend që ai të lirohej nën presion diplomatik efektiv të Qeverisë normale e serioze që na mungon”.
Siç patën thënë në Organizatën e Veteranëve të Luftës, Qenajt në Serbi i është gjetur kartela e veteranit.
E autoritetet kanë bërë thirrje që të gjithë qytetarët që jetojnë jashtë Kosovës të shmangin kalimin nëpër territorin e Serbisë.